E lē o se tala e fou i le faalogo nisi o le mamalu o le atunuu ua manuia i le faafoeina o nai pa mamoe.
O le feau lea sa tau molimoli pea e le ofisa o faatoaga a le aufai lafu manu i Avele, o le fia faailoa atu i le mamalu o le atunuu le manuia o lea foi atinae o le lafu mamoe, e pei ona manuia ai le toatele o tagata i Niu Sila faapea foi ma Fiti, lea na faamatuu mai ai nai mamoe e 44 i le tausaga 2004, ma amata fafaga i Avele seia oo ina faasafua atu i nisi o le aufai faatoaga i tua, ma ua mautala ua toatele latou ua manuia ai.
O se tala fiafia ua faailoa mai e le tamaitai fomai manu o Donner Sila, ua laasia nei le 49 o le aufai lafu mamoe i Upolu, ma le 19 i Savaii, ma ua maua ai le faitau aofaí e 68 lafu mamoe i totonu o le atunuu.
A faatusatusa i le aofai o mamoe sa aumai i le tausaga 2004 e na o le 44, sa taumafai e faafailele ma tufatufa atu foi i le mamalu o le atunuu sa talosagaina e faataitai ma toetoe mafuli latou sa faataitai, o loo faaauau pea ona tausi ma fafaga mamoe i le taimi nei.
Na faaalia e le tamaitai fomai manu, o le tala fiafia o loo aumai pea i le toatele o le aufai lafu mamoe, e sili ona tausi gofie nai lo le povi, e mafai foi ona faataaloa, pau le atugaluga ina ne‘i faatama‘ia ai e nisi. E lē faailogaina se vao e ‘ai ai, e faapea foi i soo se meaai a manu e aupito faigofie lava ona fafaga ai le mamoe.
E iai nisi aiga, sa faailoa le faaaogā o le mamoe e ta‘i ai sua e pei ona faaaogā ai pea le manu i tualo poo le puaa, ua matauina le matuā moomia tele o le mamoe pe a faaaogā i lea foi vaega o tu ma aga a le atunuu. O la outou faatamalii lenei, ua iai le manu filemu ua uma ona faavela.
E lagona i tino le talia ma le fiafia, ai seiloga o se aiga faavasivasi faatoa tetee le sua e ta‘i atu i le mamoe, ae molimanao mai i se manufata.
O suiga ia o nisi o tu ma aga a si o tatou atunuu e leai ma se isi e tau fesili ai, e faatino i le lagona ua mautinoa o se laasaga aupito sili ona lelei ua ausia.
E tele faalavelave i Savaii ua mautala ua ta‘i sua i mamoe, e faapea foi i Upolu, ua faamaonia foi sa iai nisi sua a tamalii sa ta‘i ane o le mamoe le manu filemu.
