E tupu mea avea nai lo mea e teu pea, o le tele foi o lau lulu o le tele foi lea o lau selesele, ae o le taualaga a Paulo o le sili o mea uma o le alofa lea.
Ua tusa ma le tausaga ma le ‘afa talu ona faavaeina le lala o le Toomaga mo ē Puapuagatia i Aukilani. O le auga tonu o lenei mafutaga ina ia fesoasoani atu i galuega fai a le Toomaga mo ē Puapugatia i Samoa.
O Mati i le tausaga nei sa tatala aloaia ai e le Palemia o Samoa le susuga ia Tuilaepa Lupesoliai Sailele Malielegaoi le ofisa fou o le Toomaga i Apia i le fogafale a lalo o le ofisa tuai o le matagaluega o leoleo ma falepuipui.
Sa faailogaina ai foi ma le 10 tausaga talu ona faavaeina le Toomaga auā le sulufai atu i ai o ē puapuagatia, e lē gata i tagata matutua ma aiga, aemaise o le malupuipuia ma le saogalemu o alo ma fanau ua sauaina ma tuulafoaina.
Sa mafai ona auai atu i ai le faatonu o le mafutaga i Aukilani le afioga ia Peseta Leva Aati-Schuster, faapea le susuga ia Aso Vavau auā le molimauina o lenei matatia. Sa saunia foi e le mafutaga i Aukilani le togiga atoa o lea faamoemoe e pei ona matagofie ma maualuga ai le faamanatuina o le 10 tausaga o le Toomaga i Samoa.
O le masina o Iulai na tatalaina ai le falemai mo pepe a le Toomaga i le laufanua o Tuanaimato. O lea falemai na fausia i se foai mai a se tamaitai papalagi mai Ausetalia sa tafao atu i Samoa, ma molimauina le galuega o loo feagai ma le Toomaga i Samoa, ina ia maua e alo ma fanau se nofoaga e malupuipuia ma saogalemu ai.
Talu mai le faatuina o le Toomaga mo ē Puapuagatia i Samoa i Aukilani, na mafai e le mafutaga ona tuuina ni meaalofa tupe faapea oloa auā le faatinoina o galuega fai a le Toomaga i Samoa.
Ua taunuu atu i Samoa ni pailate, o ni vaega o oloa ua foaina atu e le mafutaga a le Toomaga i Aukilani nei, ma le vaega mulimuli ua faatali mo le taunuu atu i le faaiuga o le masina. E 10 pailate o oloa e aofia ai moega pepe, taumafa, lavalava, mea taalo, napekini faapea fagususu ma isi oloa mo le fanai iti.
E silia i le WST20,000 le tau aofai o nei oloa. Sa mafai ona faatinoina nei meaalofa e ala i sailiga seleni a le mafutaga i le faatauina o le sosisi e fai i le tailua i le masina, faatasi ai ma le lima foai o nisi o kamupani e pei o le Warehouse. Ua mafai ona avatu i Samoa nei oloa i le fesoasoani a le Polynesian Shipping Line le afioga ia Tupai Suzanna Rawson e aunoa ma se totogi.
Ua toe fuafuaina nei e le Toomaga se isi faamoemoe o le Dinner of Hope mo le aso 31 o Oketopa i le hall a le Ekalesia Katoliko i Onehunga, ma o lenei taumafataga ma le po fiafia e tuu atu uma se seleni e maua mo galuega fai a le Toomaga mo ē Puapuagatia i Samoa.
E amata faatauina ticket i le vaiaso fou i le $50. O le tausaga ua mavae sa faia ai foi lea faamoemoe o le Dinner of Hope ma maua ai se se tino i tupe e WST30,000 ma sa tauaaoina lava i Samoa mo galuega fai a le Toomaga mo ē Puapuagatia.
E momoli ai foi le faafetai a le taitaifono ia Taliaoa Filipo Tipoai faapea le faataonu ia Peseta Leva Aati-Schuster faapea le komiti, i ana paaga e pei o le G-Mana Wholesale Autos, South Auckland Properties, Pinati Kekepuaa, Polynesian Shipping Line, The Warehouse, Oceania Communication, LIA Trust ma le Blue Sky e tusa ai ma le latou galuega soosoo tau‘au ua mafai ai ona faatino lenei galuega.
Ia faamanuia tele atu le Atua i lo outou lima foai ma galuega o loo tautua ai aiga, Ekalesia ma le atunuu.
