O upu mulimuli ole molimau ale tamā ia Mataafa Lafililo ole tuaa ole alii faaipoipo ia Faapale Lafililo, ina ua mae‘a lana molimau ile latou mafutaga ma lona atalii ile taimi ole taumafataga, na ia faapea atu ai ile manamea a lona atalii, Taimaimoana ua sui nei lou faaiu ia Lafililo ae ete lē toe faaiu ia Faamausili, auā o lea ua molimau aiga na lua ma le auvalaaulia o lea ua e faaipoipo nei ia Faapale Lafililo.
Ose molimau ola ma se molimau ua iai ona pine faamau auā o lea ua mae‘a le sauniga na tuufaatasia ai i laua e ala ile sauniga ole faaipoipoga ile malumalu ole Ekalesia AuUso Kerisiano i New Lynn ile taeao ole Aso Toonai 3 o Tesema.
Na faatumulia le malumalu i aiga na lua faapea uo ma ē masani e molimau le leo malie ole faatoafaiava ma le faatoanofotane ile taimi o laua tautinoga i luma ole Atua, aemaise ai le mama ua fai ma faailoga e faamausali ai le faavae ole aiga fou seia o lava ile oti, ae sili ai le upu faauuina ale Atua na saunoa iai le susuga ile faafeagaiga ia Pati Faaiuaso, lea sa ia faamamafaina ai le upu “Alofa” e tamauina ai le mafutaga ma avea ose maea sautuatolu e lē toe mafai e faafitauli ma faigata ole olaga lenei ona toe faateaeseina ai i laua seia vaganā le oti.
Ae ile taimi ole taumafataga ile hall ale Ekalesia Assembly of God i Magele na toe militino faatasi ai iina aiga na lua ma le mamalu ole auvalaaulia e patipatia le aso fiafia ole fanau le alii o Faapale Lafililo ma lana maasoama ia Taimaimoana Lafililo.
Ole afioga ia Faumuina Sikuka sa fai ma fofoga ole aso ae ole susuga ia Ui Ao Pesala sa tu tootoo ile taimi o faaaloaloga. Na maualuga ma matagofie le faamoemoe ole aiga fou ile faatasi atu iai o ekalesia e lua ole ulugalii faaipoipo aemaise ai o susuga i faafeagaiga ma o latou faletua, ae sili ai le matagofie o faafiafiaga a aiga na lua sa fai lea ma auala e momoli ai a latou faamanuiaga ma alofaaga molipo ile aiga fou.
O Faapale Lafililo e mai le afioaga o Lepa, Palauli i Savaii, ae oloo faigaluega nei ile Surface Matters, ae ole tamaitai ia Taimaimoana Lafililo e mai le afioaga o Gataivai ma Malie ae oloo aoga nei ile Iunivesite a Massey mo lana faailoga faafaiaoga.
