Ua gugulu lagona o nisi, ae gūū e le fia tautatala nisi ona ole leai ose meaalofa tupe ale Malo mo Ele Opeloge le pine muamua a Samoa mai le Olimipeka, ae ua faailoa ele Palemia susuga Tuilaepa Lupesoliai Sailele Malielegaoi, ile Aso Faraile ua mavae, ua lagolagoina ele Malo le fusuaga o sosoo ai nei a Lupesoliai Laaulialemalietoa Joseph Parker ile ave iai ole $230 afe tupe Samoa e maua ai le selau afe tala Amerika.
Ole Aso Lua ua mavae na tauaao aloaia ai le pine siliva ale tamaitai o Ele Opeloge mai taaloga ale Olimipeka. Sa tauaao ai ma le meaalofa tupe na faamaopoopo ele nusipepa ole Samoa Observer e 31 afe tala Samoa.
Ua faaalia ele Minisita o Aoga Taaloga ma Aganuu le afioga Loau Keneti Sio, ua leai se meaalofa tupe mo Ele ona o aiaiga o faiga faavae ale Malo ua mae‘a ona faataoto ua faatulaga ai tagata taaalo e tatau ona ave iai le meaalofa ua na‘o i latou e manumalo ile Pine auro.
“E pei ole aiaiga lena oloo iai ae o lea ua fai mai le toeaina (Palemia) e avatu loa se pepa ile kapeneta e faatino ai se iloiloga o lea faiga faavae”. Na faaalia foi ele Minisita ole pine auro lava oloo taulai iai le faiga faavae ale Malo, ae mo le Olimipeka ma pine e manumalo ai Samoa ole a toe iloilo ona faia ai lea ose isi faaiuga. Na tuusao le fesili ile Pelesetene ole SASNOC le faalapotopotoga oloo vaaia taaloga uma ile atunuu. E ioe le pelesetene le susuga Patrick Fepuleai e sili atu ona maualuga pine e manumalo ai ile Olimipeka tusa lava poo le siliva ma le apa memea ae peitai e lagolago le pelesetene ile finagalo ole Malo ile aiaiga oloo iai nei ua le mafai ai ona agavaa se meaalofa tupe mo Ele Opeloge.
“O lea ua fai mai le Malo ole a toe iloilo lana faiga faavae ma e tatau ona tatou talia le tulaga lena, ma le isi itu ole Malo lava lea oloo fai ma tagi iai taaloga mo ni seleni e faatupe ai ‘au oloo masii i fafo”. E manino ile finagalo ole Pelesetene e le talafeagai lava ona agavaa se meaalofa tupe mo le pine siliva ma le pine muamua a Samoa mai le Olimipeka.
Ole lagona faaalia o nisi maumau pe ana taatia pea le aiaiga lea ale Malo ae silasila ole uluai pine a Samoa mai le Olimipeka e tatau lava ona iai se taui tupe mo si alo tamaitai o Samoa ua faaeaina lona tautiga ma lona taumafai e ui ua valu tausaga talu ai ona mae‘a le Olimipeka i Saina lea e auala mai ai le pine ua manumalo ai Ele Opeloge.
“O a‘u lava ia tusa lava pe ua leai se meaalofa ale Malo oute fiafia pea, ae ua ou lagona e le o faatāuaina la‘u tautua e lo tatou Malo,” ole saunoaga lea a Ele ina ua fesiligia e tusitala ile mae‘a ole tauaaoina o lana pine siliva.
