E le faatusalia fesoasoani a isi Malo oloo faipaaga ma Samoa ile atinae ole tamaoaiga o lo tatou atunuu. O Saina ose isi lea Malo mai le atu Asia ua molimauina le saoasaoa o lana pipii mai ia Samoa ona ole faitau miliona ma miliona o tupe o ana fesoasoani ile atunuu.
Peitai o Iapani ose isi lea o paaga totino a Samoa mai tausaga ua tuanai e oo mai ile taimi nei e le o mafai ona motusia le faigaiuo vavalalata. E toe faamanatu mai afa malolosi o Ofa ma Valelia i lagona ma mafaufau ona ole faatafunaina ole atunuu.
O Iapani na sili foi ona aapa mai e fesoasoani lea ua vaaia ai le taligalu sima malosi ile faataamilosaga ole gataifale ole taulaga o Apia. Ole uafu i Matautu i Apia le isi fesoasoani lelei a Iapani mo Samoa aemaise o vaa lau pasese oloo fausia ma aumai ai ise tau e gafatia ae e lilifa lava ile fesoasoani a lea Malo. Ole maketi o ia na fausia e Iapani ma le uafu mo vaa fagota, ae e tele foi le sao o lea Malo ile aumai o tagata popoto faapitoa i se soo se matata e aofia ai ma aoaoga e galulue i Samoa. Ole fa tausaga ua mavae na amata ai ona faatu le ofisa ole Malo o Iapani i Samoa ma aumai ai le sui o lea Malo e galue ai.
Ole faatuina o lea ofisa ua faigofie ai mo o tatou tagata aemaise lava i nuu ma afioaga ona talosagaina fesoasoani a lea Malo mo le fausia o faleaoga faapea atinae laiti mo le manuia o tagata lautele. O tausaga ua mavae sa nao le ofisa o Iapani i Apia ae o galuega uma mo le iloiloina o talosaga ma faia faaiuga ile talia ma le teena sa ave uma ile ofisa o lea Malo i Ueligitone Niu Sila aua ole ofisa tutotonu lea ole Amapasa o Iapani mo Niu Sila ma Samoa.
Peitai ina ua iai lona ofisa mautu i Samoa na filifilia ai loa le afioga Tuimaugaoalii Kazumasa Shibuta e avea ma uluai Amapasa o lona Malo e galue ile atunuu.
Ua mae‘a le fā tausaga o lana tautua ma ua faalua ona faaopoopo lona taimi galue. O lea la ua filifilia mai sona sui le susuga Shinya Aoki sa tauaao atu ile afioga ile Ao ole Malo ona tusi taualoga ole Amapasa filifilia o Iapani mo Samoa. Faaalia e le alii Amapasa le tumau pea ole lagolago a lona Malo mo le atinae ole tamaoaiga o Samoa i soo se itu. Ole faafetai foi lea ale afioga ile Ao ole Malo, Tui Atua Tupua Tamasese Efi, ile alii Amapasa fou ona oloo mafanafana pea sootaga vava lalata o Malo e lua.
