E oo mai ile aso, e leai se feiloaiga ale afioaga o Vaiusu ma le malo, e faatatau ile uafu oloo ta’u ai le igoa o Vaiusu. Ile talanoa ale tofa a Ulugia Aukuso oloo tusi matua iai itu paepae ole aiga Sa Ulugia, ma le afioaga, “e leai se silafia ole matou nuu ile tulaga o faalagi nei, faapea ole uafu e fau i Vaiusu.
Ole tulaga foi i alii ma faipule ole matou nuu, e lei feiloai, pe malamalama i lena mataupu. “Na ou faalogo atu lava o saunoa mai le Palemia, ile faatinoga ole faamoemoe lea, ae lei feiloai mai ile matou nuu, i tulaga tau ile matou gataifale pe afai e iai se faamoemoe faapea ole malo.”
“E fono lava le matou nuu i Aso Toonai muamua o masina taitasi, ae leai se mataupu faapea na lotea, pei ona agiagi mai le malo. Afai e feiloai le matou nuu, ise tofa ma le faautaga, e leai se mea e fai pogisa. E tatau ona fesiligia le malo poo a aiaiga o na mea.”
“E leai foi se tulaga ole faafuasei lava omai, ae faalupe ai le matou nuu, o eleele ia o eleele ole matou nuu. Afai e mafuli ise tulaga e le talia e le matou nuu, ole tulaga lava lena, ae na’o na agia lava faapea ole uafu e fai i Vaiusu, ae leai se feiloaiga.”
Peitai na talanoa le tasi o matai ole afioaga o Vaiusu e nofo lata ile sami, “Na iai le taimi ole tausaga talu ai, na omai ai Saina feoai i gatai atu ole latou fale. Sa fua mai a latou pine ma faasolo ane lava ile mea oloo iai le pa’u matu pe a oo ina maui atu le tai. Faasolo atu ile la pito o iai le togatogo ma agai atu i tai.
Masalo ole latou fuafuaga lena na fai, ae leiloa pe ua lata se taimi ole suesuega fai ile palapala ma aafiaga ole togatogo ma meaola o iai. Na talanoa le matai lea, ole uafu, e foliga e le pipii mai i eleele o Vaiusu. E foliga e fau i gatai atu, fua ile ata na vaai iai. Ma o luga foi ole ata na tilotilo iai, e iai foi tamai motu se lua e fau, oloo atagia mai ile ata, e fau ai luga fale tetele lava.
I faamaumauga mai le fā tausaga talu ai, na sainia ai e Samoa se feagaiga MOU Memorandum of Understanding ma le kamupani Saina, le Shanghai Construction, faatatau ini galuega tetele se tolu, e aofia ai le Malaevaalele Faavaomalo i Faleolo. Faapena foi le MOU mo le Uafu i Vaiusu ma le Maota ole malo i Savalalo. Na iai foi le feagaiga na sainia ma le kamupani ale China Frist Railway ile toe faateleina ole malae vaalele i Faleolo.
Mai lena fa tausaga talu ai, na talanoa ai le Minisita o galuega, i lena vaitau ile fa tausaga talu ai, Manu’alesagalala Enokati, ole faamoemoe ina ia faatino na galuega, ile tupe $2piliona tala lea na ofo mai e le malo o Saina i atunuu e valu ole Pasefika e aofia ai ma Samoa.
Ole faamoemoe i lena vaitaimi, ina ia unaia tulaga tau tulisi ile Pasefika, ia lelei malaevaalele, auala, ma ia avea ai Samoa ose taunuuga o femalagaiga ile tatou itulagi, ua alagatatau ai lava ona atinae o tatou uafu, ia sili atu ile mea o iai, ma ausia ai manaoga ma faamoemoe. Ole auala mo masini e oo mai nei oloo taatia pea mai Mulinuu agai ane i Vaitele.
Sa tele ina faaaoga e tagata fagogota e savavali ai ma a latou ofe. Peitai o tala ole fuafuaina ole uafu mai le fa tausaga talu ai, na talanoa ai foi le tasi faipule, ua tulai mai nei ile Vaega faaupufai ale HRPP, “afai e aafia ai le afioaga o Vaiusu ile uafu, e tatau lava ona faia se fesootaiga ile nuu, ma faatalanoa lea mataupu.
Ua faamautuina mai e le tofa Ulugia a Aukuso o Vaiusu, e leai se silafia ole latou nuu i lea faamoemoe ole malo e faatatau ile uafu ua faalagilagi ai lo latou nuu.
