Aisea ua sosolo ai pei se faama’i ma sasao faaafi le solitulafono ole faiaiga faamalosi ma le faia o uiga matagā i alo teine laiti ole atunuu? Ose fesili e tofu i tatou ma le tali iai. Ole lua masina ua mavae e oo mai ile masina lona 11 o lenei tausaga 2017 e lē o faaitiitia solitulafono nei e oo atu ile faamasinoga.
E fa’i ole faamasinoga faaitumalo oloo faamasino ai alo tama laiti ua molia ai, ae ole faamasinoga maualuga i alii matutua ile va ole 20 ma le 50 tausaga ua molia ai e leoleo ae ua oo lava i tamā matutua ua aulia le onosefulu ma ona tupu ua molia ai foi e leoleo.
Ua tiga ai fofoga ile faalogoina pea o lipoti a leitio, televise ma nusipepa i nei soligatulafono, peitai e lē nofoa’i le galuega tau logologo a auala o faasalalauga eseese auā e iai lona taua mo tagata uma. E mafua ona ilitata nisi e faitau ma faafofoga i tala o nei solitulafono ona ole ma’ale’ale o faamatalaga ile faatinoga o nei gaioiga faameaola oloo aafia ai fanau teine ale atunuu.
Ole vaiaso lava ia na tea nei e lau faaiuga o nisi solitulafono tau faiaiga fai faamalosi ma le faia o gaioiga matagā ae oloo faagasolo ona suesue molimau o nisi solitulafono faapenei.
Ole Aso Faraile na tea nei na faasala ai se alii 30 tausaga le matua ile 16 tausaga ma le 6 masina ile falepuipui ina ua faamaonia moliaga e lima ole faia ose fesootaiga tau faiaiga ma se teineititi ei lalo ole 16 tausaga le matua, ma le moliaga ole faiaiga faamalosi poo le rape.
Ole Aso Lulu ole vaiaso lava na tea nei na faasala ai ile 15 tausaga ile falepuipui se isi taulealea ina ua faamaonia moliaga ole faiaiga fai faamalosi ma ni teineiti se toalua ei lalo ole 16 tausaga le matutua.
O ia tamaitai oni uso laiti ole toalua o lē ua faasalaina.
Ole Aso Faraile ole vaiaso foi ua mavae atu nei na faasala ai foi se isi taulealea ile 13 tausaga ile falepuipui ina ua faamaonia ona moliaga ole faiaiga fai faamalosi ma le faia oni uiga matagā ise teineititi ei lalo ole 16 tausaga ose teine aoga ise Aoga tulagalua a se ekalesia.
Ole vaiaso nei ua faatulaga e lau ai le faasalaga ose tamā ua 60 tausaga ole soifua ua ioe i moliaga e lima ole faiaiga fai faamalosi ma le moliaga e tasi ole mataifale. Ole teineititi na aafia ose tasi o lona aiga sa nofo i lē ua molia ma lona toalua ma alu ile aoga ose Kolisi i Upolu ase ekalesia.
E le fesiligia ole faasalaga o lea tamā ua matua ole falepuipui. Ole masina na tea nei o Oketopa e tolu foi ni mataupu faapenei na faia iai faasalaga faafalepuipui ale faamasinoga. Ole ata manino lea ole faatupulaia o lenei solitulafono i Samoa.
Ose tasi o mataupu faapenei ile tau amataga o lenei masina ole a mae’a na faasala ai foi ele faamasinoga se tamā ua 67 tausaga ole soifua ile 24 tausaga ile falepuipui ina ua ioe i lea solitulafono na aafia ai lona lava afafine moni. E toalua le fanau ale teineititi na maua ai ma lona ma’itaga lona tolu na faapa’u ina ua fefe le teineititi ua iloa e ona uso ma tuagane aemaise o lo latou lava aiga.
