Na mae‘a loa le fono ale Kapeneta ile Aso Tofi ua mavae na suia ai le Minisita ole Matagaluega o Leoleo lea ua toe vaaia ele Palemia, Susuga Tuilaepa L Sailele Malielegaoi, ae feiloai le Palemia ma minisita o lana Kapeneta ma le Matagaluega o Leoleo.
Ole afiafi ole Aso Faraile ua mavae ile lata ile lima ile afiafi na faia ai lea feiloaiga ile ofisa tutotonu ole Matagaluega i Apia. E lei mafai ona faataga le tusitala e molimauina le feiloaiga peitai sa mafai ona fesiligia nisi o leoleo sinia. “Ose feiloaiga matagofie, manaia le saunoaga ale Palemia e toe faalototele ai matou ile faaauauina pea ole tautua mo le Malo ma le atunuu”. Ose finagalo lea ose tasi o tamaitai leoleo sinia ma lana saunoaga ua fiafia ua toe foi le vaaiga ole matagaluega ile Palemia. “E lelei foi le afioga Sala ae ose suiga ua tatau ona faia i lenei taimi ua tele le gasu ua feagai ma leoleo”.
Ole feiloaiga lava lea e pei ona faaalia ese tasi o alii leoleo sinia sa apoapoai ane ai le Palemia ma sa ia faailoa ai foi ole Matagaluega o Leoleo ose tasi lea o matagaluega ale Malo ua sili ona tulai mai ai feteenaiga ile va o ē oloo pulea ma nisi ole lautele o Malu ole Malo.
Fai mai le leoleo sinia sa faaalia ai ele Palemia ua lē toe iai le faaaloalo ma le galulue faatasi o leoleo sa iai i tausaga e tele ua mavae. “Sa saunoa lava lana afioga poo fea o iai le discipline o leoleo sa faaaloalo ma faalogo leoleo i lalo i leoleo sinia ma ē oloo taitaia vaega eseese ole matagaluega”.
Ole molimau foi lea ale toatele o leoleo sinia ile latou molimau mai ile tulaga lea. “Ua lē toe maua taimi o Komesina matutua ua mavae e leai se isi e faatuiese ise faatonuga, auā sa galulue ma le fefefe i toeaina matutua. O aso foi na e lē mafai ona e sola ma le faatonuga auā a lē usitai ua ta iloa lava lota iuga ole molia ma tu ile Tribunal a leoleo poo le faamalolo ma le galuega”.
Ole feiloaiga la ile Aso Faraile ua mavae e pei ona faamatala le tamaitai leoleo sinia o Supt Sina Enoka Tafua, sa fautua malosi ane ai le Palemia ile matagaluega ina ia faagalo mea na tutupu ae tulimatai pea le tulaga lelei ole faatinoga ole galuega ma tiute o leoleo.
Sa faaalia foi e Sina e leai lava se saunoaga ale Palemia na afea ai tulaga ile toe molia ole Komesina o leoleo. Ole feiloaiga lea na auai ma le Minisita sa vaaia le matagaluega le afioga Sala Fata Lisati Pinati.
Ole lima tausaga ua mavae sa avea ai ma minisita o leoleo ma falepuipui, peitai ole ogatotonu ole tausaga nei ise isi suiga o matagaluega ma faalapotopotoga ale Malo e vaaia e Minisita ole Kapeneta, na aveesea ai le Pulega o Falepuipui mai le vaaiga ale afioga Sala.
O lea ua lata ina mae‘a le tausaga nei ae ua toe aveese le matagaluega o leoleo ae ua ave iai nisi o faalapotopotoga ale Malo sa ile vaaiga ale afioga Lautafi Fio Selafi Purcell, ole ofisa o Numera Faamaumauina ma le ofisa ole Suetusi Sili ale Malo.
