Samoa 22 Fiji 24

Matagofie le vaaia o le malosi o le finau a le Manu Samoa i le taaloga amata o le Pacific Nations Cup i Suva i le aso Toona’i. Na toe itiiti lava manuia le taumafaiaga a le ‘au  i le taaloga ma le Flying Fijians.  O se taaloga foi na vaaia ai le taaalo leaga o le ‘au a Fiti, e toatolu na tutuli i tua mai le taaloga.

O le afa muamua o le taaloga e le i lelei le taaalo a le Manu Samoa, e tele mea sese, pa’u le polo na manino lava le leai ose fesootaiga lelei a le ‘au i luga o le malae, e leai foi se isi e faitio ona o le puupuu o le taimi na tuufaatasia ai le a’u, o nisi o tama na malaga sa’o mai lava i Peretania i Fiti feiloai ai ma tau tuufaatasi ai le ‘au i nai aso a’o lumanai le taaloga lea ma Fiti.

E uma le afa muamua oua 17 ai o Fiti ile 3 a Samoa. O le foi mai ile afa lona lua na toe maua ai foi le isi sikoa a Fiti ma oo atu ai o latou ai ile 24. Peitai, na muta ai iina ma le malosi o Fiti ina ua amata ona maopoopo le taalo a le Manu Samoa, ma maua ai lana sikoa muamua e le afa mataalia ia Melani Matavao. O le sikoa lona lua na maua le e Jack Lam ma le sikoa lona tolu na maua e Dwayne Polotaivao. O sikoa uma nei a Samoa, na faavae i osofaiga malolosi a le laina i luma a Samoa, ma maua ai avanoa na osofai atu ai i totonu sikoa nei e tolu a Samoa.

Na ta’ua e le kapeteni o le Mani Samoa ia Chris Vui, “E le i lelei le taaalo a le ‘au ile afa muamua, ae o le afa mulimuli na lelei ai le taaalo a le Manu, peitai, e toe maua ane ‘ai ua uma foi ma le taimi. O Chris Vui na matuai mataina lava lana taalo ile Aso Toonai, o ia na taitaia le tele o osofiga a le laina i luma a Samoa, lea na vaaia ai le solomuli o le laina i luma a Fiti,

Na faaalia foi e Chris Vui, e lei mafai ae le au ona taalo ile ituaiga taalo sa fuafuaina, ona o le tele o mea sese ma polo pa’u ma maua ai avanoa o Fiti e osofai mai ai ile afa muamua o le taaloga.

O le maitau ile taaloga, o le faaletonu o le ‘au a Samoa e mafua lea ile le lava o le taimi e tapena ma sauni ai, peitai, e le na o Samoa na vaaia ai lea tulaga, na maitauina foi ia Fiti le faaletonu o le latou foi taaalo ona o le mafuaaga lava e tasi.

E lei mafai foi e Samoa ona faaaoga lelei le avanoa na o latou maua inau a tutuli i tua ma le taaloga tama taaalo a Fiti e pei o  Jale Vatuba ma Akapusi Qera, ona o le  pu’e leaga i le afa muamua, ae tuli i tua Eroni Mawi i afa lona lua. E lei maua se ‘ai o Samoa ile taimi na taaalo le atoa ai le au a Fiti

O sikoa a Fiti na maua lea e Kini Muriurivalu, Ben Volavola ma Henry Seniloli ilea fa muamua ae ole  afa lona lua na maua ai le sikoa  Vereniki Goneva ma o’o ai ‘ai a le Flying Fijians i le 24-3.

E maua le tatao a Goneva ae toe 30 minute o le taaloga o totoe. O iina na amata ai le tali a le Manu i le minute 59th o le taaloga i le tatao Melani Matavao. Soso’o ai ma le tatao a Jack Lam ae faaiu e Dwayne Polataivao na sui atu ia Matavao.

O taaloga i le aso Toonai e feiloai ai Samoa ma Tonga, ae feiloai Fiti ma Georgia. E leai se taaloga a le Manu ma Georgia.

E ui ua faiaina le Manu i le taaloga ma Fiti , ae na ta’ua e le alii kapeteni le matua manaia o le avanoa lea e tapena ai mo Siamani po’o Portugal mo se avanoa o Samoa i le Ipu o le Lalolagi i Iapani 2019.

Faaiuga o Ta’aloga

Samoa 22 (Dwayne Polataivao, Melani Matavao, Jack Lam Tatao; Cons Tusi Pisi, Ah See Tuala; Pen, Pisi) Fiji 24 (Goneva, Murimurivalu, Seniloli, Volavola Tatao; Volavola 2 cons)

Georgia 16 Tonga 15