O le to‘a selau o fanau a le atunuu o le a tuua Samoa i le faaiuga o le masina nei ma le amataga o le masina fou mo aoaoga i Iunivesite i fafo e ala i avanoa sikolasipi ua faamanuaiina ai, o le a malaga ese ma le atunuu ma fautuaga ua ave i ai aemaise o lapataiga ua tuusa‘o i ai e le Malo e ala mai i le Palemia.
“Toatele nisi o fanau ua faaletonu aoaoga ona o faaletonu e pei o le faamimisa, tago i le ‘ava malosi, ma nisi lava faaletonu ua le mae‘a ai aoaoga”.
O le finagalo lea o se tasi o sui o le komiti o sikolasipi ina ua tāpā sona finagalo i le sauni atu o fanau mo atunuu i fafo. Fai mai lea sui ua lē finagalo e faailoa lona suafa, o mātua le faamoemoega o le Malo e fesoasoani i fanau i le ave i ai o le faamalosiau.
O le autu foi lea o le saunoaga a le taitai o le Malo le afioga i le Palemia susuga Tuilaepa Lupesoliai Sailele Malielegaoi, i le sauniga faapitoa e masani ona faia i le amataga o le tausaga e faamavae atu ai i le au sikolasipi.
“Faaaogā lelei le avanoa lea ua e maua. Ia outou manatua o outou ua filifilia mai luga o le fuifui. Toatele ua toe faafoi mai ma lē toe tuua i ai se isi avanoa e le komiti o sikolasipi ona ua faatāua i ai latou le mea a lea masani o le tafaovale, faiuo, faamisa. Tele ia o mea faapea aemaise a Fiti”.
Faaalia e le Palemia o le faamisa e mafua mai i le onanā o nisi o tama talavou ona oso lea e puipui le isi tama Samoa, ae lē iloa ua afaina ai lo latou iai i totonu o Iunivesite. Ua iai nisi o faaletonu faapea ua maliliu ai nisi fanau mai nisi atunuu i fafo.
O le autu o lea faamanatu a le Palemia ona e lē tatau ona toe tupu ma aafia ai nisi o alo tama ua maua le avanoa sikolasipi i fafo.
O i latou uma ua faamanuiaina e tatau ona toe foi mai i Samoa e galue mo le Malo e tusa ai ma aiaiga o a latou aoaoga lea e ta‘ua o le Bond.
E lē mafai ona mae‘a a latou aoaoga ona nonofo ai lea i fafo ma galulue ai, pe filifilia e alu i se isi atunuu pe foi mai i le atunuu ma galue i se isi kamupani.
O Fiti, Vanuatu, Ausetalia ma Niu Sila o le a malaga i ai fanau a le atunuu. O Niu Sila ma Ausetalia o loo faatupeina aoaoga a nisi o fanau, ae o loo iai foi avanoa sikolasipi o loo fesoasoani mai ai nisi o Malo e pei o Iapani ma Saina. O nisi o fanau o le a aooga mo le sailia o faailoga i tomai e pei o le faafomai ma le loia faapea nisi o tomai faapitoa.
O le susuga i le faafeagaiga o le ekalesia EFKS i Vailele Siaosi Salesulu na faia se upu apoapoai faaleagaga mo fanau. Sa ia faamanatu ia i latou le tāua o le sauni e tuua le atunuu ma se vaega o le honey suamalie, e fai ma faamanatu o le tāua o lona iai i nuu ese mo le sailiga o se isi tomai sili atu mo le tapuaiga a le Malo ma le atunuu aemaise o mātua ma aiga.
