O le amataga o le masina nei o Aukuso na amatalia ai le taamilosaga o le Ipu o le lalolagi a le itupa a tamaitai i le lakapi iuni, lea o loo faagasolo i Falani, o loo auai atu i ai le tatou ‘au a tamaitai le Manusina mai Samoa.
O le taamilosaga o le Ipu o le lalolagi e pei ona silafia na amata i le tausaga 1991 i Uelese, seia faaauau mai lava i lenei tausaga, lea e sefululua atunuu o loo tausinio ai mo le Ipu o le 2014, e aofia ai Samoa, Niu Sila, Uelese, Falani, Ausetalia, Kanata, Ireland, Egelani, Kazakhstan, Sepani, Afelika i Saute ma Amelika.
E lē faigofie le taamilosaga mo si a tatou ‘au ona e lē o tutusa le malolosi o tatou teine taaalo ma le tulaga o loo iai le maualuga o le faatinoga o le taalo e isi ‘au tetele o le lalolagi. O le ‘au a Samoa le Manusina o loo i le Pool A faatasi ma Egelani, Kanata ma Sepania, peitai e faanoanoa e faasilasila atu e leai ma se malo a si a tatou ‘au, ae ua matuai lami aato ai lava nei ‘au e tolu i si a tatou Manusina.
Masalo a talatu mai, ailoga a mafai ona lele i Samoa si Manusina pe afai ua gaui uma apaau e lua. O le taaloga ma Egelani i le aso muamua o le Ipu o le lalolagi, i le faagasologa o taaloga a Pools taitasi, na manumalo ai le ‘au a Egelani 65 i le 3 a Samoa.
E lelei lava si a tatou ‘au peitai o le gese lava o le faagaioina o le polo, ma le vaivai lava o le puipui ma le pue a nai tamaitai i le maitau, ae faaopoopo i ai ma le masasau tele o le tamomo‘e a tamaitai Europa, e leua ane lava ma tatao le polo i le laina sikoa.
O le latou taaloga lona lua, o le ‘au a Kanata 42 i le 7 a le Manusina. E ui lava i le malosi o le ‘au a Kanata, peitai faafetai na maua le avanoa e laasia ai le laina sikoa mo se ‘ai a Samoa.
Na mataina foi le taaloga ma Sepania ma o le taaloga mulimuli foi lea o Pools, 5 ai lea o Samoa i le 41 a Sepania. E malosi tele le unai o le sikalamu a Sepania, ma le sikoa na muamua tau ‘ai ai i le fā minute muamua o le taaloga, ona ua vaivai le tulei a le Manusina, faasasasasa atu ai i le tulimanu ma tatao ai le polo o le sikoa muamua a Sepania.
Peitai e lei leva lava ona toe faatamo‘e le pasiga a Samoa, ae toe mimilo le taaloga i le itu a Sepania, pasi mamao atu i le tulimanu ma tatao ai e le tamaitai o Merenaite Aliitasi Faitala-Mariner le polo mo le sikoa muamua mo Samoa.
E ui e lē o se faaiuga lea na naunau i ai si a tatou ‘au, ae o le mea taulia ua laasia le laina sikoa, ua tauia le tautiga o nai teine. E ui la ina malolo uma taaloga a le Manusina, ae moni ai le faamalosi a nai teine i luga o le latou facebook, ‘e lei fausia Roma i se aso e tasi’.
Toe tasi le taaloga o totoe mo le Manusina, o le va lea ma le ‘au a Afelika i Saute lea e tutusa lelei lava le taufai leai o se manumalo i taaloga e tolu o Pools ua mae‘a, ma le faamoemoe o le a manuia le taaloga lea a si a tatou Manusina.
O le Aso Lulu lea e tapena ai le tatou taaloga mulimui lea, saili ai le tulaga iva. Ae o le tulaga moni ia mo le finauina o se tulaga mo le Ipu autu o le taamilosaga, ua misi lava le tatou avanoa.
O le Aso Sa o le faaiuga o le vaiaso lea e faamoemoe e tapunia aloaia ai le World Cup o lenei foi tausaga 2014; a o ai a manumalo?
