O le taimi muamua lea ua talimalo ai Sini i le vae lea o le Lakapi Iuni Taitoafitu e pei ona masani i tausaga ua mavae, o Kuiniselani lava sa faatino ai le taamilosaga. E lua aso o le taamilosaga, aso 6-7 Fepuari i le malae taalo a le Allianz Stadium. E pei ona silafia e 17 aulakapi taitoafitu faavaomalo sa tausinio i le faaiuga o le vaiaso, peitai o le Pool C sa finau mai ai Samoa, faatasi ma Fiti, Falani, ma Argentina.
Aso muamua, na malolo ai le Manu Samoa ina ua lami ai Fiti i ‘ai e 31 i le leai a le Manu. Sa manumalo le Manu Samoa ia Falani i ‘ai e 29 i le 14, ae toe malolo foi ia Argentina i ‘ai e 4 i le 12.
E lē o se taamilosaga faigofie i le maitau, e ui i se taumafaiga peitai na maua lava le avanoa e tauva ai mo le Ipu Faaofuofu poo le Bowl. E pei ona silafia i le vae i Ueligitone na se‘i mavae, sa manumalo ai le Manu Samoa i le sailiga o le Bowl lea sa final ai ma Sikotilani.
Na sao si a tatou ‘au e fetaui ma Portugal i le Semifinal muamua o le Bowl ma manumalo ai, ae sa fai si faatamala i isi taaloga ma vaaia le tele o pue misi, tele foi le avanoa e sikoa ma maua ai ni ‘ai faaopoopo mo Samoa ae pau lava ua misi.
O le ‘afa muamua talu ona amata le taaloga, ae osofai Samoa pasi faaogatotonu maua e Gregory Foe ma faasasa‘o loa i lalo o le pou, i le faatoa 4:29 minute talu ona amata le taaloga. O ‘ai o le taaloga Samoa 7-0 a Portugal.
Toeitiiti lava a sasi le vaai semanu e laasia e Portugal le laina sikoa, see mai fai le sikalamu o le polo e togi e Samoa. Na eu faatopetope mai i tua e Tila Mealoi le polo ma faasasa‘o ai i le laina sikoa, Samoa 14-0 Portugal.
Sa faapea ailoga a laasia e Portugal le laina sikoa i nai minute mulimuli o le ‘afa muamua, peitai o le faatamala ma misi le pue a Mealoi na sikoa ai le ‘au a Portugal, Samoa 14-5 ae ta loa le malologa.
Ina ua amata le ‘afa lona lua, sa muamua ona tau ‘ai Portugal ina ua faia le laina i fafo o le polo e togi e Samoa. Sa fai si faatamala ua soona togi i tua le polo ma maua ai e le ‘au a Portugal ae leai foi se puipui mai tua, ma sao atu ai lava Portugal i le laina sikoa i le toe 2:44 minute o totoe o le taaloga.
Ua laki lava le vave uma o le taimi ma le lelei o le taumafaiga a si a tatou ‘au e puipui mo nai minute totoe, ae na semanu e lē sao mo le sailiga siamupini o le Ipu Faaofuofu. O le iuga na manumalo Samoa 14-10 Portugal.
Toeitiiti lava foi a toe fetaui Samoa ma Sikotilani i le sailiga siamupini a le Bowl i le faaiuga o le vaiaso e pei ona siamupini ai i le vae i Ueligitone, peitai ua fai lava si saoasaoa ma le malolosi o le ‘au a Kanata ma manumalo ai Kanata ia Sikotilani i le Semifinal lona lua o le Bowl 35-12.
O le taaloga i le va o Samoa ma Canada e saili ai le siamupini o le Ipu Faaofuofu, o le faatamala lava i le ‘afa muamua o le taaloga e toe finau atu lava ua fai si tuai. ‘Afa muamua o le taaloga toeititi lava sao Samoa Toloa e tatao le sikoa muamua, peitai toe sasi lava ma lē manuia ai le taumafaiga, peitai sa tatao lava le sikoa muamua a Kanata i le tulimanu, kiki faasasa mai le tulimanu fafao. Toe o ni nai minute totoe o le ‘afa muamua ae toe laasia foi e Kanata lalo o le pou 12-0 a Samoa.
O le ‘afa lona ma le faamoemoega o le toe oso malosi mai ai le Manu, peitai na toe falō foi Hirayama ma tatao le sikoa mo Kanata, 17-0 Samoa. Toe tatao atu lava sikoa e lua mulimuli mo le Manu, lea na sikoaina e Belgium Tuatagaloa ma Pheonix Nofoa ae ua tuai lava ua mae‘a le taimi.
E ui e lei manuia taumafaiga a si a tatou ‘au mo lenei taamilosaga, o loo lumanai Las Vegas 4-6 Mati, tele se taimi e toe tima‘i ai manatu ma lagona ma le malosi o si o tatou ‘au. Ae ua mou atu uma na lagona ina ua toe faatepa foi e le All Blacks si Kangakaroo i le final o le Ipu autu, toe suipi foi Niu Sila i le vae i Sini ina ua manumalo i le taaloga ma Ausetalia 27-24, ma se lagona faagaeetia ina ua manumalo uma le auso Ioane i faailoga taualoa o le taamilosaga.
Player of the tournament HSBC Sydney – Reiko Ioane
Player of the Final HSBC – Akira Ioane
E mae‘a le vae lea o le taamilosaga taitoafitu lakapi iuni i le faaiuga o le vaiaso, tulaga tutusa Niu Sila, Fiti ma Aferika i Saute i le tulaga muamua o togi i lona aotelega ta‘i 69, a o loo tulaga 10 le Manu Samoa 28 togi i le faatulagaga o ‘au a le lalolagi.
Faamalo lava le taaalo i si a tatou ‘au ae toe oso foi le la.
