Sa eva i se fale kalapu le alii o Ioane Isitolo o Vaiusu ona ta lea o le 11 i le po taliu i lona aiga. Na alu atu afe i se faleoloa o lo latou nuu e faatau sana sikaleti ae tau atu ai i lē na aafia i le solitulafono o loo inu mai i le faleoloa ma nisi o taulelea. Na uma ona faatau le tapaa a Ioane ona liliu lea ma foi ilo latou fale, peitai na faaalia e leoleo o le taimi lea na mulimuli atu ai lē na aafia ma nisi alii talavou ma tuliloa Ioane.
Fai mai leoleo ina ua oo atu le ua molia na lavea ai i se tu’i a lē na aafia. O le mafuaaga lea o le solitulafono ma e lei toe faatali Ioane ae fai loa tuliga ma lē na aafia ma isi taulelea sa latou inu i le faleoloa. Na momo’e Ioane e fia maua lē na aafia ae na tau atu i se sikulukalaiva (screwdriver) o taatia mai i autafa o le aualatele. Na ia aapa loa iai ma aumai ma momo’e. Peitai o lē na aafia na tamo’e saoasaoa ese seia oo ina lavea lona vae ma palasi ai loa i lalo.
O le avanoa lea e pei ona faaalia i faamaumauga a leoleo na faaoolima ai Ioane i lē na aafia ma ia faaaoga le sikulukalaiva e tatui ai ni vaega o lona tino. Na ave i le falema’i lē na aafia ma taofia ai mo ni vaiaso mo le togafitiina o ona manu’a tuga mai le faalavelave. Na molia loa e leoleo Ioane ma molia ai i lona faaoolima, umia o se aupega matautia, ma le faia o se solitulafono ma le faamoemoe e osofai ai se isi tagata ma lamatia ai le saogalemu o lena tagata.
I le faaiuga a le faamasinoga maualuga na silasila ai i le ogaoga tele o manu’a o lē na aafia ma le taimi na taofia ai i le falema’i.
E le o misi se vaiaso ma oo i le faamasinoga mataupu e aafia ai le faamisa aemaise o le aafia o le avamalosi. Na ave Ioane i le polokalame e faatonutonu ai le amio i le tagofia o le avamalosi peitai sa ia le usitaia aiaiga o le polokalame ma sa le mae’a vaiaso na tuu e auai i a’oa’oga.
O le silasila a le faamasinoga o Ioane e le o se tagata na iu lelei ana a’oga ma e ola mai se aiga e maualalo le tamaoaiga. Sa iai sona moliaga muamua i le tausaga e 2016 o le tuuina atu lea o faamatalaga sese i leoleo.
Sa ia le usitaia aiaiga o lona nofo vaavaaia ma le polokalame o le avamalosi ma ua iloa ai e le o iai se loto ua salamo mai ana solitulafono. Ua faia ai le faaiuga e faasalaina o ia i le 2 tausaga ma le 3 masina i le falepuipui i Tafaigata.
