E toalua ni alii faipisinisi mai Amerika Samoa ua faato‘ai atu nei se la tagi ile US Transportation faasaga lea ile kamupani vaalele ale Hawaiian Air, ina ua taofia e lea kamupani vaalele le avanoa lea sa mafai ai ona filifili ele tagata malaga le nofoa e fia nofo ai pe a alu malaga.
O lea faaiuga ale kamupani vaalele ua faia mo na o malaga ile va o Honolulu ma Amerika Samoa, ma ose tulaga ua faagau lē malie ai toatele o tagata malaga mai Amerika Samoa mo Hawaii.
Na ta‘ua ele alii faipisinisi iloga i Amerika Samoa, Avamua Dave Haleck ole faaiuga ale kapmupani vaalele ua lē talafeagai ma solitulafono foi, ona e na ole tasi lava le faigamalaga oloo faaaogā iai lea tulafono, ua na ole va lea o Amerika Samoa ma Hawaii.
Ole finagalo faaalia foi lea ole isi, o Daniel King na ia ta‘ua, ose faiga faailogalanu i tagata Samoa ma ua lē talafeagai tele lenei faiga.
Ole vaalele Boeing 767 ale Hawaiian Air oloo femalagaai ile va o Hawaii ma Amerika Samoa oloo faapitoa iai le tulafono fou lea ale kamupani vaalele. Na faaalia ele Hawaiian Air, ole mafuaaga o lenei tulafono ina ia mafai ai ele kamupani vaalele ona faasoa nofoa o tagata malaga e fua ile mamafa, ina mafai ona paleni le mamafa o itu e lua ole vaalele ina ia ogatasi ai ma tulafono faavaomalo.
Na faaalia foi ele kamupani vaalele, ua maitauina lava le toatele o tagata malaga ile va o Hawaii ma Amerika Samoa, e lapopoa ma mamafa tino o tagata. E iai la le faaeteetega ile lē paleni ole mamafa o itu e lua ole vaalele, pe afai e tuu le avanoa e filifili ai ele tagata lona nofoa, ae uma ane e nonofo uma tagata lapopoa ile itu e tasi ole vaalele.
Ole faamoemoe ole kamupani, ina ia faasoa lelei tagata lapopoa ma mamafa pauna ma pasese e māmā pauna faapea foi tamaiti, e iai foi nisi o nofoa ole vaalele e faaavanoa e lē nonofo ai nisi, o ia gaioiga uma e faia lava mole saogalemu o faigamalaga.
E ui lava i lenei faamalamalamaga ale kamupani vaalele, peitai, e lē o nofo lelei lava i lagona ole alii faipinisi ia Avamua Dave Halleck. Na ia ta‘ua, e leai mase malaga mai Hawaii ise isi atunuu o faatonuina ai pasese ina ia fua o latou mamafa, e leai foi ni malaga mai Hawaii ise isi lava atunuu, ua taofia ai le saolotoga e filifili ai ele tagata le nofoa e fia nofo ai ile taimi ole faigamalaga, ae na‘o Amerika Samoa lava oloo fai mai iai lenei faiga lē fetaui.
E iai foi le talitonuga o nisi o tagatānuu o Amerika Samoa, e lē na‘o tagata Samoa e lapopoa ma mamafa tagata, e lapopoa ma mamafa atu tagata oloo malaga ile va o Hawaii ma Amerika, ae leai lava ni tulafono faapea o faia ele Hawaiian Air.
E tusia lenei lipoti e lei maua se tali mai le tetee ua tuuina atu e alii faipisinisi Amerika Samoa ile US Transportation faasaga ile Hawaiian Air. Ole Hawaiian Air pau lea ole kamupani vaalele oloo faafoeina faigamalaga ile va o Amerika Samoa ma Hawaii.
