Sama le tatau a le susuga ia Tanielu Vau
E lē faigofie le filifiliga a le taulealea Samoa na te laeiina le tatau a le atunuu, auā foi e tiga toe lē lava onosai i le mamafa o le au, e faapena foi i le tapuaiga pe a latou vaai i se tasi o taoto e lagona le alofa ona o le maai o le au o sasaina ai le tino. E ui lava la i le tiga i le taimi e galue ai ae o lona taunuuga e fefete ai ma avea ai loa ma sogaimiti e galue i le fale o matai.
Ua taunuu ai upu a le atunuu o le faiva e tapuaia e a‘e foi ma le manuia. Sa lē faigofie i aiganalua le tapuaiga o le taoto ai o le susuga ia Tanielu i lana tatau auā sa lē iloa pe tua i ni ā lenei faamoemoe, ae o le viiga ma le faafetai i le Atua na alaga ai le leo o le manumalo i le aoauli o le Aso Toonai, 13 o Tesema ina ua faaiuina ma le manuia le galuega sa alo faiva i ai le susuga i le agaiotupu ma le falefa o le aiga salemalama.
O le patipatia ai o lenei faamoemoe na auai uma ai aiganalua faapea foi uo ma ē masani. O lenei sauniga na faataunuuina lava i le maota o le susuga ia Tanielu Vau i Papatoetoe.
O le taitai o le sauniga o le susuga i le faafeagaiga ia Afa Vau, ae o le taitai tufuga sa nafa ma le galuega o le afioga ia Pasina Sefo Ah Ken mai Faleaseela. E 3 vaiaso na taoto ai Tanielu i lana tatau ae tailua aso o le vaiaso.
O le mae‘a ai o le sauniga lotu na sosoo ai loa ma le taumafataga ma faafiafiaga. O le afioga ia Leiatua Maa sa fai ma fofoga o le aiga faatasi ai ma le lagolagosua a le afioga ia Faasavalu Mona. O upu tomuli o le aso na saunoa ai lava le fofoga o le aso ma faaiu ai loa i faaaloaloga e pei ona masani ai.
