E molimau eseese le faalogologo a mātua i totonu o falesa taitasi e pei ona latou molimauina ai le sao o fanau ile faatāuaina ole latou Aso Sa Paepae. E pei ona masani ai Aso Sa o Lotu Tamaiti o polokalame uma lava i soo se ekalesia, o fanau ua tuu atoa iai le polokalame latou te faatinoina.
EFKS Avondale
Ole EFKS i Avondale ile susuga ile faafeagaiga ia Rev Auvaa Eneliko male faletua ia Alofale Eneliko na vaaia ai le solo tele ale fanau faaitualalua e amata mai i fafo ole falesa seia agai atu i totonu ole malumalu ma usu a latou pese.
O laei papae ale fanau faatasi ai ma faiaoga Aso Sa ma le lipine viole ua matagofie ai a latou tapenaga faatasi ai male teuina ole falesa ile lanu lava lea, e faailoa ai lo latou faatāuaina ole filemu o Keriso i totonu o loto o mātua a‘o molimau fanau ile avanoa e fai ai lo latou sao mo mātua ma aiga.
Ole faitauina ole Tusi Paia, ole tatalo ile faafetai, faamagalo male faatoesega ua faaaogāina uma ai lava le fanau ile taimi ole sauniga.
O pesega ma siva faapea tala faatino, o nisi ia molimau ola ma ave feau ile faalogologo a mātua ma aiga, ma sa vaaia ai loimata o mātua ile ootia i nei polokalame.
Ekalesia Metotisi Manurewa ma Middlemore
Ole susuga ile faafeagaiga ia Rev Foua Tuisafia male faletua ia Tagialisi male ekalesia i Manurewa na latou faatauaina foi laei papae ale fanau male lipine lanu meamata na latou momoli mai ai le tāua ole ola i totonu ole ekalesia ma aiga.
Ae ole anavatau poo le manulauti na tatai iai lagona ma mafaufauga ole fanau ma ole autu filifilia foi lea ale Ekalesia Metotisi aoao, “E tua i manuia le ava i mātua” ma ole autu foi lea na faaautu uma iai pesega ma tala faatino ole Aso Sa.
E faapena foi ile ekalesia Metotisi i Middlemore ole autu foi lea na agai uma iai lagona ma mafaufauga ole fanau e ala ia latou polokalame.
First Samoan Revival Church Otahuhu
I totonu ole ekalesia First Samoan Revival Church i Otahuhu ose tasi lea ekalesia na mataina foi le matagofie o tapenaga ma sauniuniga ale fanau; o lauga o pese ma tala faatino na suia ai lagona o mātua ile tāua o feau momoli ole aso, ile manatu autu o matua fai taga ma tauloto a fanau ua faatusaina lea o fanau e pei o tamai olive e vagavagaia lau laoai, a‘o avā ia avea lea ma vine e fua tele mai i totonu ole fale.
I totonu o nei sauniga uma e lei tele se taimi na toe manāva ai e susuga i faafeagaiga le upu faauuina ale Atua auā ua latou talitonu ma ioe ua lava taoso tapenaga ale fanau ma faiaoga Aso Sa e tapena ai loto ma agaga o tagata i tiute ma galuega ole vaiaso aemaise o luitau olaga o nisi vaega tāua na mataina i nei polokalame, ole gagana Samoa na faaaogaina e tamaiti e momoli ai le feau, mai lava i fanau tai lima tausaga e oo i fanau matutua e leai se fesasiai o le tautala.
Ae sili ai o le fiafia o matua na molimauina tauloto ma mau a le fanau ile malamalama gofie ile autu.
Ile aotelega o molimau a fanau i ekalesia eseese o fanau o tamai olive ia e vagavagaia le laoai, oloo ia te i latou le ola ole galuega ile lumanai e pua‘ina atu ai le filemu o Keriso i loto o mātua ma aiga ole ekalesia auā le manuia ole galuega mo a taeao.
Ole tele foi o ekalesia ua tapena faatasi le itu faaleagaga e ala i polokalame lotu ale fanau male itu ile tino e ala lea i toonai na saunia e aiga lotu e toonai faatasi uma ai fanau o le ekalesia.
Ma ose vaaiga sili lea ona tāua ile soifuaga faasamoa e pei ona masani mai ai i aso ua mavae.
