Ua sauni atu nei le tamaitai o Latafale Auvaa mo le agai atu i Saina e faatapena ai lona ulu atu i le tauvaga mo le sailia o se Tausala o le Lalolagi poo le Miss World e pei ona o le a faia i le Beauty Crown Grand Theatre i Sanya, i Saina i le aso 19 o Tesema.
O le malosi o le tali mai a le Palemia i se faasalalauga a le Tausala o le Pasefika i le vaiaso na tea nei na manino ai le faate‘ia o le Susuga Tuilaepa Lupesoliai Sailele Malielegaoi i le laga e le tamaitai tausala o ana fuafuaga o le a lē alu i le faapalega o le Tausala o le Pasefika i le Atu Kuki ona e tatau ona i Saina i le taimi o lea faaaliga auā le sailiga Tausala o le Lalolagi.
O Latafale Auvaa lea foi ua filifilia e le Komiti o le Tausala a Samoa o le Lalolagi e fai ma sui o le atunuu i lea faaaliga tele. O le tausala muamua lea o Samoa ua filifili sa‘o mo lenei faamoemoe lea sa filifili ese mai lava le teine tauva mo Samoa i le tauvaga ua mavae atu. E ui i lea, o le a agai atu Latafale Auvaa i lea faaaliga e faia a o avea o ia ma Tausala o le Pasefika ma o le masina fou i le taimi tonu e amata ai le tauvaga a tausala o le lalolagi i Saina ae e tatau ona iai lea tamaitai i le Atu Kuki auā le faasee atu o lona pale ma lona tofiga i lē o le a manumalo i le tauvaga tausala a le Itulagi mo lenei tausaga.
Na alu Latafale i luga o le TVONE ma faalauiloa ai ana fuafuaga ona sa iai fesili na tuu atu i ai pe o le a faalēaogā ai la lona pale mai o le Tausala o le Pasefika i le taimi lenei pe afai e agai i Saina a o lei faapaleina le tausala o le Pasefika.
O le faamatalaga a lenei tamaitai ua mae‘a ona faaoo lana tusi e faanoi ai i le komiti o le Tausala a le Pasefika ma ua talia foi, ona o le manaoga e telē foi le aogā o le agai atu i le tauvaga tele faavaomalo lenei i Saina mo le saga unai ai o faalauiloa e faatatau ia Samoa.
Na maua foi se talanoaga a le sui o le Samoa Times i Aukilani ma le tamaitai faatonu o le Miss Samoa New Zealand, o ia foi o le Franchise/Licence Holder o le Miss World Samoa, le afioga Ulalemamae Te‘evā Matāfai, ma toe faamautinoa ai e Ulalemamae, sa latou uia lava le auala e pei ona tuuina atu ai le latou faatalosaga i le Komiti o le Tausala a le Pasefika ma taliaina mai.
O le ala foi lea o le faia o tapenaga a le tamaitai o Latafale e pei ona faagasolo i ni vaiaso ua tuanai atu, lea na malaga atu ai i le Atu Kuki e faia ni ana faalauiloaga mo le tauvaga o le Tausala a le Pasefika, ma na ta‘ua e lipoti ua talia ai le faanoi a lenei tamaitai, ma ua silafia uma ai lava le suiga o le a iai.
Ma o le tausala o le Pasefika na muamua atu ia te ia, lea o le a faapaleina le tausala o le Pasefika i le faaiuga o lenei tausaga.
O lona uiga e alu lava Latafale i Saina o loo pale lava o le Tausala o le Pasefika. Ae i le faatalatalanoaga ma le alii Palemia i le faaiuga o le vaiaso na tea nei na ta‘ua ai le faate‘ia o le Palemia i lea faaiuga ma na ia ta‘ua e tuu atu tauvaga e tatau ona ave i ai le faamuamua ae agai Auvaa latou i tauvaga e leai se mea e maua ai.
Ta‘ua e le susuga Tuilaepa Lupesoliai Sailele Malielegaoi, e tasi lava le tauvaga e ese mai i le sailiga o le Tausala a Samoa e ave i ai le faamuamua a le atunuu, o le tausala lea a le Pasefika, lea na faapea ona mafai ona faatino i lenei vaitau ona o le agai ane o Samoa e toe faamalosia i le tele o tausaga sa lē amanaia ai lava e le tele o atunuu o le Pasefika.
O se suiga ua vaaia nei le tele o atumotu ua toe agai mai e opogi, ma o Samoa lava ia ua tele ina vaavaai i ai atunuu e talimalo i tausaga taitasi i le faatamoega o lenei tauvaga ma le faatāua ua ave i ai auā le unaiga foi o le atinae o tagata tafafao maimoa mai i fafo.
O lona tofiga la o le Minisita o Pulega o Tagata Tafafao Maimoa mai i Fafo a Samoa, na ta‘ua e le Susuga Tuilaepa o ia e te‘ite‘i i le faaiuga ua faalauiloa e Auvaa ma o le a talanoa foi i le Komiti o le Tausala a le Pasefika i lenei mataupu.
Na ia ta‘ua o le manao tele le taumafai o Samoa e agai i nei tauvaga tetele faapea ae e tatau lava ona ave le faatāua i le tauvaga a le Pasefika, ma e oo ai loa se tamaitai i le tofi Tausala o le Pasefika, ona faigofie lava foi lea ona faalauiloa atu Samoa i le itulagi aemaise isi atunuu o le lalolagi atoa.
I luga o le itulau o le Facebook, o loo faaali ai foi le tele o lagona eseese o le mamalu o le atunuu i lenei mataupu ina ua aliai mai le tusitusiga i le upega tafailagi a le nusipepa o le Observer, ma e ui ina ta‘ua e nisi le tulaga atonu pe ua tiga le finagalo o le Minisita o Pulega o Tagata Tafafao Maimoa mai i Fafo a Samoa, o le afioga foi lea i le Palemia, pe atonu ua misi ona logo totino atu lana afioga i lenei suiga pe afai o le mea moni lena na tupu.
Peitai o loo māfuli lagona o le atunuu, e lē faapea ua misia e Latafale le tauvaga a le Pasefika ona e faapea o loo toe tauva ai, e ui e tāua foi lona auai e faamae‘a lelei ona tiute sa tauave mai o le Tausala o le Pasefika.
Ae o le auai atu o lenei tamaitai lalelei o lo tatou atunuu i lenei tauvaga tele a le lalolagi, atonu pe maua sona tulaga pe leai, peitai i le maitau atu i le tulai mai foi o lenei alo o Samoa e lē gata o se tamaitai lalelei tele i ona foliga vaaia, ae o lona atamai ma le talenia i le tele o vaega o le soifuaga e oo lava i taaloga, e mafuli ai lagona o le toatele, e mafai e Latafale i se tulaga matilatila, ona faalauiloa le Pasefika, aemaise lona atunuu moni o Samoa i ana tu ma ana aganuu i na foi faalagamaea tele o tauvaga a le lalolagi.
Sa iai se sailiga tupe na fuafua i le faaiuga o le vaiaso na tea nei mo le fesoasoani e ave ia Auvaa faapea ai le Tausala o Samoa ua iai nei lea e sauni atu i le tausinioga i le Atu Kuki ma ua toe tolopo nei se‘i toe soalaupule lenei mataupu ona faatoa faataunuuina loa lea.
Ae mo Latafale lava ia, o loo faaauau pea ana tapenaga ma nofosauni atu mo le tauvaga i Saina.
Tau ina ia manuia le alofaiva atu a lenei alo o Samoa i lona faamoemoe, i le avea ai o ia ma avefu‘a a Samoa i lea itu o le lalolagi.
O loo faalauiloa e le Miss World Samoa le itulau o le Givealittle i le upega tafailagi e mafai ona agai i ai soo se tasi e fia fai sana foai tau seleni e lagolagoina ai tapenaga a le tamaitai o Latafale Auvaa mo lona faamoemoe i le Tausinioga mo le Tausala o le Lalolagi.
Asiasi i le tuatusi mo le foai
