Ua folasia nei i luma ole faamasinoga maualuga i Mulinuu mau ale afioga Peseta Vaifou Tevaga ose Faatonu ole kamupani nonu ole Local Partners and Associates e lagolago ai lana su faasaga i isi Faatonu ole pisinisi nonu le Minisita o Faatoaga ma Faigafaiva le susuga Laauli Leuatea Polataivao Schmidt, le tofa Apulu Lance Polu, ma le susuga Martin Schwalger.
O Laauli e le ose faatonu o lesitalaina le suafa ile kamupani ae o Martin Schwalger o lona sui aloaia oloo lesitala. O Peseta Vaifou o lona atalii sa lesitala aloaia ose faatonu ae na aveesea le suafa o lona atalii ae tuu iai lona suafa ina ua aliali mai ni fesouaina faalotoifale i mataupu ua talitonu Peseta ua lē fetaui ma lana silasila. Ole mafuaaga lea na ave ai lana tagi muamua ile faamasinoga e faia se poloaiga e faataga ai ona ia silasila i faamaumauga o tupe ma galuega uma ale kamupani ina ua teena e isi faatonu lona ulufale ile lotoā ma le ofisa i Vaitele.
Na faia le faaiuga ale faamasinoga ile tausaga e 2015 ma tofia ai se tagata e nate vaaia ise tulaga lē tumau galuega ale kamupani a‘o tālia se isi faamasinoga na molia ai Peseta i moliaga ole faia oni faamaumauga sese ma saini faamalosi suafa o faatonu ise tusi na ia ave ile Matagaluega o Leipa oloo vaaia le lesitala o kamupani e tuu ai lona suafa ile lisi o faatonu ae faaui i tua le suafa o lona atalii. Na lē faamaonia ia moliaga ina ua mae‘a ona suesueina molimau.
O lea la faatoa suesue ele faamasinoga le su a Peseta faasaga i faatonu ona o tuua‘iga ua faaalatua ona faia fefaatauaiga ole sua ole nonu ma ua iai tupe ua lē teuina ile teugatupe ale kamupani ae ua ese se isi igoa le Samoa Nonu Delights ua teu ai tupe ile faletupe ole Samoa Commercial Bank ae ua lē ole faletupe ole Westpac sa iai le teugatupe.
Ole lala ole Westpac Bank i Samoa ua faatau ele faletupe mai Papua Niu Kini ole Bank of the South Pacific poo le BSP e pei ona iai nei. Ole molimau a Peseta na ia faailoa ai ile faamasinoga le lē logoina o ia i fefaatauaiga ole sua ole nonu ma tupe na maua ai.
Na ia faailoa foi ile faamasinoga le faaaogā sese o meatotino ale kamupani e pei o taavale, ma o nei faaiuga ua faia e aunoa ma le logoina o ia ose isi faatonu ole kamupani. Na molimau foi Peseta ana leai lona fanua na ave faamau ai le nonogatupe ile NPF, e le maua se tupe e faatau ai le pisinisi. Na ta‘ua foi e Peseta e na‘o ia na iai le aseta (fanua) na faagaioia ai le amataga ole kamupani ae o Laauli, Apulu ma Martin e leai ma se isi na iai se seleni.
Ina ua molimau Laauli sa ia faailoa ile faamasinoga sa logoina Peseta ile tele o fonotaga ma feiloaiga ae e lei auai. I lona talitonuga o ia ma Apulu ma Martin oloo umia le tele o sea ole kamupani e mafai ona latou faia faaiuga ma tonufai.
Na molimau foi Laauli pe ana le avea e Peseta le mataupu ile faamasinoga e le faaletonu tupe maua ale kamupani ma le solomuli foi nisi o paaga sa latou faifaimea faatasi sa mananao latou te faatauina le sua ole nonu. Ole molimau foi lea a Apulu e le aafia le kamupani ini faaletonu lea na molimauina ile tausaga ua mavae i ana tupe maua pe ana leai le tagi a Peseta. Sa faailoa e le loia a Peseta le afioga Leuluaialii Olinda Woodroffe, nisi o tupe na maua mai le nonu na talaina mai le teugatupe ile Samoa Commercial Bank lea na talaina nisi o tupe i suafa o nisi o alo o Laauli ae o nisi tupe na tala ile suafa ole faletua o Laauli.
Na faamaonia e Laauli o nisi o lana fanau ma lona faletua suafa mai faamaumauga ale faletupe na talaina ai seleni. Peitai na faailoa e Laauli ina ua fesiligia e le loia a Peseta o ia tupe uma sa faaaogā i galuega ale kamupani e pei o totogi o tagata faigaluega.
O Iulai ole tausaga e 2015 na talaina ai le 220 afe i lalo ole suafa ole faletua ole Minisita ma e tasi lava le tali a Laauli o tupe sa tala e faaaogā i galuega ale kamupani. Ole tofa Apulu na molimau foi ma ia ta’ua o tupe na talaina ese mai le teugatupe ale Samoa Nonu Delights sa faaaogā mo galuega ole feaveaiina ole nonu ma galuega lava ole lotoifale ole kamupani.
E mae‘a suesuega ole mataupu lenei oloo molimau le tofa Apulu ma o lea ua tolopo ile aso 28 o Iuni e toe faaauau ai molimau ale itu oloo faasaga iai le su a Peseta.
