O le alo atu o le atunuu i lana faigapalota i le masina fou, ua lē masino ai le pisi o sui tauva o le a sauni atu e tamomoe mo tofi faipule o itumalo. E alofagia lava le tagata e osi aiga ma osi nuu e ala i le susue o le faamalama o le Isaraelu moni ma tepa ane.
Na to‘ai taunuu mai i laufanua mafanafana o Kuiniselani le tofa ia Ale Vena Ale i le Aso Lua ua tuanai, ma maua ai le avanoa e faatalauula ai lona alalafaga o Toamua ina ia lagolagoina lona faamoemoe, lea sa faataunuuina i le Aso Toonai ua tuanai (30 o Ianuari) i le Tiafau Hall a le Ekalesia EFKS Southwest Brisbane.
O le tofa ia Ale Vena Ale o le a toe tamoe i le tofi faipule o Faleata i Sisifo. E lē toe po se lilo sa avea muamua o ia ma tofi o le Palemene i se taimi muamua peitai na toe suia ina tauave mai e le sui o le Tautua Samoa lea tofi, peitai e lē mavae lona agaga fia tautua pea i lona itumalo, lea ua afua ai lona finagalo, e ao pea ona toe taumafai a o alo atu le atunuu i lana faiga palota.
Na lolofi atu alo ma tama fanau faapea nisi o paolo ma gafa e lagolago lenei faamoemoe ma o latou tauaaoina se seleni e tusa ma le $12, 773.70.
O le susuga i le toeaina ia Ps Andrew Schmidt o le ekalesia Voice of Christ sa taitaia le sauniga lotu ona faagasolo lea o polokalame o le aso.
Na maua se avanoa e faatalanoa ai le Komesina o le ofisa o faigapalota a Samoa i luga o le leitio, Faimalomatumua Matthew Lemisio i le Aso Sa ua tuanai, ma ia saunoa ai e faapea, e ui lava ina tapu ma faasā faatosina i Samoa, peitai e lē aiāina e Samoa tulafono a isi atunuu e pei o Ausetalia ma Niu Sila.
E le o mafai ona taofia le malaga mai o sui tauva e saili seleni auā ana tapenaga mo le sauni atu mo soo se tofi o le Palemene. O le fofoga o le aso o Tuisa Patea.
Na momoli le agaga faafetai o le tofa ia Ale Vena Ale ona o le talisapaia e le alalafaga o Toamua i Brisbane o lana sāvali e pei ona malaga mai ai.
