O Galuega ale Nuanua ole Alofa i Samoa e faalagolago i tupe o fesoasoani mai faalapotopotoga i fafo, ae e lē o nofoai foi faalapotopotoga i Samoa ile tuu atu ole tau’au e tausoa ai galuega ale Nuanua ole Alofa ose faalapotopotoga oloo faia polokalame mo le atinae o tagata e iai manaoga faapitoa, poo ē lē atoatoa le malosi ole tino ma le mafaufau.
Ole kalapu ale My Girls o ona sui o alii faafafine ua galulue e fesoasoani i tagata oloo fia maua le fesoasoani e pei ole Nuanua ole Alofa. Oloo faia foi a latou fesoasoani mo le vaaia o totonu ole lotoifale o aiga o sui ole kalapu.
“E tāua tele ia i matou le fesoasoani i tagata e iai manaoga faapitoa”, na saunoa ai le Pelesetene ole My Girls ina ua maua se feiloaiga ma tusitala ina ua tauaao le latou seleni e $2,000 afe tala mo le Nuanua ole Alofa. “Ua tolu nei tausaga o matou maua lenei agalelei mai le kalapu ma e tele ma anoanoai a matou galuega mo le lelei o tagata e iai manaoga faapitoa ole a faaaogā iai le seleni ua foai mai”. Na faaalia foi ele Pelesetene ole Nuanua ole Alofa pe ana leai lea agalelei e lē mafai ona faatupe nisi o manaoga ole faalapotopotoga e pei ole totogiina o auala o feoaiga pe a alu se malaga e asia ai a latou polokalame oloo faagaioia i nuu ma afioaga ole atunuu. Sa tuusa’o le fesili ile pelesetene ole Nuanua ole Alofa pe iai se gaioiga ale latou faalapotopotoga e faailoa ai i faalapotopotoga oloo fesoasoani atu le faaaogāina o seleni ina ia mautinoa le tausisia ele latou auaunaga o taiala o pulega lelei.
Na faaalia ele Pelesetene e faia a latou lipoti e tuuina atu i faalapotopotoga i fafo oloo maua ai fesoasoani tau tupe auā o aiaiga ia o fesoasoani tetele, ae mo le foai ale My Girls e lē o iai se latou maliega poo ni aiaiga. “E le faatamala matou ile faaaogā tatau o seleni nei auā matou te iloa e lē faigofie le sailiga o tupe e nei faalapotopotoga agalelei ilo latou faamoemoe e aumai e faia ai nisi vaega o a matou galuega faatino”. Oloo tapena nei ele Nuanua ole Alofa se latou faamoemoe oni faailoga taualoa e tuuina atu ini tagata, poo ni faalapotopotoga ua latou faia ni galuega maoa’e ma lelei e fesoasoani ai i tagata e iai manaoga faapitoa.
Ole faamoemoe lenei ua faaigoaina o faailoga taualoa mo le amanaia o aiātatau o tagata e iai manaoga faapitoa.
