Ua savalia le tolu vaiaso talu ona fanau se tina talavou i le vaega o le maota gasegase o Tupua Tamasese Meaole i Motootua mo tina ma‘itaga, ma faapea ona fano ai le ola o lana pepe, ae ua faaalia o loo faia se suesuega faalotoifale a le Matagaluega o le soifua maloloina i le mafuaaga o lea faaletonu.
O Malielegaoi, ina ua tapa sona finagalo e tusitala e mafua ona o se finagalo o se tasi o faipule o le Itu Agai, le tofa Lealailepule Rimoni Aiafi. Faaalia e lea faipule o le Tautua Samoa, o se suesuega e faia e ao ona silasila i ai pe lē o le lē lava o le malologa a tausi soifua ma fomai le mafuaaga o le faaletonu na tupu.
Saunoa le Palemia e lē tatau ona soona tuulafoai ni saunoaga faapea i le aufaigaluega i le lē lava o le taimi e malolo ai, ona o le aufaigaluega ua aoaoina lelei i lea foi auaunaga ma tautua. O le suesuega o loo faagasolo o loo tuuina atu ai lipoti tusitusia mai tausi soifua sa tiute tonu i le taimi na fanau ai le tina e ana le pepe ua uma le ola, faapea foi ma lipoti tusitusia mai fomai sa galulue ai i lea taimi.
O lipoti ua faasalalauina muamua e faatatau i lea faaletonu o loo tuua‘ia ai e le tina e ana le pepe le galuega a fomai ma tausi soifua. Ua faaalia foi e se molimau o loo iai se laasaga e faaono oo ai se tagi a le tina i le Faamasinoga Maualuga ona o le uma o le ola o lana pepe.
O se tasi o faaletonu faapea sa aliali mai i le maota gasegase i Tuasivi i nai tausaga e lei mamao atu sa faaulu ai se tagi a le toalua o le tina na fanau maliu ma fano ai ma le ola o le pepe ona o tuua‘iga foi i le faatinoga o tiute o tausi soifua sa tiute i le taimi na faatiga ai le tina. O lea mataupu sa tagofia e le faamasinoga ma taunuu ai i se faaiuga na malilie i ai itu e lua, ina ia ave le mataupu e soalaupule i le va o itu lea e ta‘ua o le mediation.
E $6 miliona na su ai e le aiga o le tina lea le matagaluega o le soifua maloloina. O le soalaupuleina o le mataupu i itu e lua e oo mai i le taimi nei, e lē o iloa poo le ā se taunuuga ua oo i ai, pe ua totogi se tinoitupe o se taui i le itu tagi, pe ua toe faaui i tua le mataupu ma faamuta ai.
O le suesuega o loo faia i le mataupu talu ai nei na tulai mai i le maota gasegase i Motootua e lē o iloa poo afea e maua ai se faaiuga.
