O le ala laupapa savali ua mae’a fausia i totonu o le toagatogo faasao o le nuu o Moataa o se poloketi tāua lea ua tatala ma faaaogā e sopoia ai e aiga o nonofo i lea vaega o le afioaga, i le agai i uta ma le agai i le aai. O se galuega tāua lea ua faatino ise fesoasoani tau seleni mai le UNDP na tauala mai i le faalapotopotoga o loo faasoasoaina tupe o foai mai fafo.
Sa iai le auala savali sima sa faaaogā e le nuu, ae sa le saogalemu lea mo lo latou faaaogāina aemaise o le lamatia ai o le togatogo. O se tasi lea o togatogo pito tele i le Vaimauga ona na saunoa le afioga Asi Semisi Blakelock o se tasi o matai Sa’o o le afioaga, o se vaega tele o le togatogo ua tanumia ona o le galuega sa tanu ai le vaega ua iai nei le faletalimalo o le Taumeasina, aemaise o le nofoaga ua iai le malae taalo o le Apia Park Complex.
O le ala sima sa faaaogā o se auala savali na faaalia e le afioga i le Aoee o se auala sa mafai ona faaaogā e sopoia ai le aai ma se vaega toatele o aiga o le nuu o loo alala i uta. Peitai na avea le ala savali lea ma auala e faaaogā e le toatele o aiga i le aai mo le agai i uta i nofoaga sulufai ina ua tulai mai le sunami na aafia ai se vaega o le atunuu ia Setema o le 2009. O Mati o le tausaga nei na amata ai loa ona faatino le galuega o le ala laupapa savali na faatupe i se fesoasoani mai le vaega o le CCSP ma le UNDP.
E 190 mita le umi o le auala ma o se galuega ua leva o tapena iai le afioaga. O le siitia o le sami e pei ona fesootai ai le togatogo ma le gataifale o le nuu o se isi lea itu tāua na naunau ai le paia o le nuu e faatino se galuega.
E 50 afe tala Amerika na maua e Moataa mo le puipuia o le togatogo ma ua aofia ai ma aiaiga o le taofi ona toe taina ma faaaogā togo auā o se nofoaga sili ona tāua mo le nonofo ai o i’a ma figota. O le galuega ua mae’a ua faigofie ai le tele o isi tiute tāua mo tagata o le nuu aemaise o le tāua o le puipuia ma le faasao o le togatogo o le lumanai manuia lea o tupulaga o le afioaga.
