E vaiaso atoa o faagasolo le koneferenisi ale Ekalesia Emanuelu Christian Ministries i Aukilani lea sa talimalo ai le Emanuelu Christian Ministries i Papatoetoe le afioga ile Peresetene aoao ia Rev Mika Lagavale male faletua ia Malia faapea le ekalesia.
O susuga i faafeagaiga ma o latou faletua ma sui usufono uma a lenei ekalesia oloo i Ausetalia e aofia ai Melepone, Sini ma Brisbane sa auai uma i lenei koneferenisi faatasi ai ma Ueligitone. Ole Aso Gafua 26 o Setema na tatala aloaia ai loa lea fono tele ile malumalu ole Emanuelu Christian Ministries i Papatoetoe ile taulaga o viiga male faafetai ile Atua ona o lea ua faataunuuina male manuia le fono ale ekalesia e pei ona usuia i lenei tausaga.
O sui usufono uma faapea susuga i faafeagaiga ma o latou faletua sa auai i lea taeao e patipatia le alofa ole Atua a‘o taitai ele Peresetene ia Rev Mika Lagavale ma lona soatau le sui peresetene ia Tanuvasa Eric Toomata le viiga ona sosoo lea male saunoaga aloaia ale Peresetene aoao ia Rev Mika Lagavale e tatala aloaia ai le mafutaga.
Ole Aso Gafua ile Aso Tofi ile taeao e fai ai aoaoga (workshop) ile Tusi Paia e failauga faapitoa mai Amerika, le Perofeta ia Michael Dalton male Senior Pastor ia Jim Bayne ile malumalu lava ole Emanuelu Christian Ministries i Papatoetoe, ae o le po e fai ai mafutaga (Rally) mole lautele o tagata e aofia ai faifeau, o sui usufono, tupulaga talavou aemaise o i latou e asiasi atu e fia faalogologo ile upu ale Atua ile Baptist Church i Manukau.
Ole manatu autu na tulimatai iai loto ma agaga ole fanau ale Atua i lea fono, “Open Haven” ma ose faitotoa tele lea sa maitauina i tagata sa auai ile koneferenisi ua tufi taufao ai nei manuia ua liligi mai.
Ma sa leai se tasi e lei faamanuiaina le loto i lea savali ile vaiaso atoa mai lava i tagata matutua e oo lava i fanau. Ole pine faamau o lea mafutaga, ole afiafi ole Aso Tofi na molimauina ai tapenaga a ekalesia taitasi e ala ia latou aitema, ae sa taitaiina e tupulaga talavou.
Ma e ese foi le maoae ole faaaogāina o fanau i lea itutino ole galuega i totonu o ekalesia, o pesepesega, o faaevagelia ua felanulanuai ma matagofie ma ua galulue faatasi male upu faauuina ale Atua ma ua faamalosia ai lava le pulunaunau ole loto i faamanuiaga mai le Atua. Ole tasi o vaega tāua, o aoaoga sa fai faapitoa mo fanau poo tupulaga talavou ile Baptist Church i Manukau ele Perofeta ia Michael Dalton male Senior Pastor ia Jim Bayne, ua faaigoaina ole Combine International Youth, ole faamoemoe maualuga o ia aoaoga, ole atinaeina pea male faamalosia o agaga o talavou e ola galulue i totonu o ekalesia auā o i latou ole lumanai lea ole galuega. Ole Aso Faraile ose aso faapitoa lea mo aiga uma i totonu ole ekalesia, ma ua avea foi ose aso taalo, ma faataunuu ai le ipu ale Peresetene ile taaloga tapolo e pei ona faataunuuina i fonotaga taitasi.
E ese foi lagona na vaaia e tagata sa auai ile fono ile vaiaso atoa seia oo mai lava ile Aso Faraile na tapunia aloaia ai le koneferenisi, ua iai le lagona ole lē fia ta‘ape ona ua manaia ma fusia tagata uma ile fiafia mai le Alii, e pei ona fai mai Tavita, ‘Se mea ina lelei male matagofie o uso ae nonofo faatasi.’
Saunoa le susuga ia Tala Burgess ole failautusi aoao lea ole ekalesia, o lenei koneferenisi e tailua tausaga ma fai, ma ole 2018 o lea ua fuafua e talimalo ai Ausetalia ile fono.
