Ise faatalatalanoaga ma le Susuga ia Ron Hellesoe mai le Waitemata District Health Board (WDHB) sa ia ta‘ua ai e faapea, o le gasegase lenei ua matautia le televave ona maliliu ma maimau ai soifua o le mamalu o Samoa faapea foi tagata lautele.
Afai ua 50 i le 74 tausaga o lou soifua ma e te alala i le itumalo o Aukilani i Sisifo poo Waitemata District Health Board (WDHB) e aofia ai pitonuu nei o North Shore, Rodney ma Waitakere, o lou avanoa lelei lava lea e faatino ai loa au siaki e faia fua meamanū o maua pea le avanoa, ma faatino au siaki e faaumiumi ai mafutaga ma tatou fanau ma aiga.
Saunoa Ron o le matautia o le ma‘i lenei, ona e lē maua pe a tui lou toto (blood test) ae faatoa maua lava pe a faatino le siaki lea o le otatavale o le tino. O le ma‘i lenei e ese le faigofie o ona togafitiga pe a vave maua auga ma faailoilo ina ua uma ona faia lau siaki.
O loo faagasolo pea i le taimi nei le lafoina atu o tusi valaaulia poo (test kit) i pusameli ma tuatusi a le mamalu o Samoa ma tagata lautele o loo alala i pitonuu o Waitemata, North Shore ma Rodney e pei ona ta‘ua i luga mo le faatinoina o lau siaki.
O siaki nei e faatino lava i maota ma laoa ona toe lafo mai ai lea i teutusi lafo fua (free post envelop) ua saunia e toe faafoi mai ai vaega o le otaota mamao o le tino (samples) o loo manaomia mo le faatinoina o le siaki (Bowel Screening Test).
A mae‘a sailiiliga ma faamaonia poo (results) ona toe logoina atu lea o oe e lau fomai faaleaiga (Family Doctor) pe tusi atu foi le matagaluega ia te oe mo le isi vaega tāua e sosoo ai.
Afai e maua faamaoniga o loo lelei ma leai se afaina (negative), ona faatali lea mo le isi lua tausaga e toe fai ai le isi au siaki. Ae afai e maua ni faailo o le ma‘i i lau siaki (positive), ona toe logo atu lea e te afio mai mo ni suesuega atili (colonoscopy) e saili ai le mafuaaga o faailo ma togafitiga.
E faafetaia e le susuga Ron le alofa o Le Atua ona o nei avanoa lelei ua tatou maua i lenei vaitau e fesoasoani ai mo tatou tagata i le faia fua lea o nei siaki taugata, a o lea ua mafai ona faatinoina e aunoa ma se totogi.
Talu ai le matautia o molimau ma faamaumauga a le matagaluega i le toatele naunau ma le faaopoopoina pea o fuainumera o tagata maliliu i le ma‘i lenei, o le mafuaaga lea ua toe tatala ai e le malo le avanoa ina ia faaauau pea le auaunaga seia aulia le faaiuga o le 2017.
O nisi ua ala ona vave maliliu ona o le faatamala i le lē faia o a latou siaki e pei ona fautuaina ai i latou e fomai, a o nisi foi ua maliliu ona o le soona aai i meaai lololo, meaai oona, meaai suamalie faapea le soona taumafaina o le avamalosi ma le lē faautauta.
O le tuualalo a le susuga Ron Hellesoe mo tatou tagata Samoa faapea tagata lautele, ia aua ne‘i faatau agavale i le ma‘i ae faatino lau siaki, ona ua toatele ua maliliu ai.
Ma o loo maitauina foi le maualuga o le pasene i tausaga taitasi o i latou ua maliliu ona o le ma‘i, ae lē gata i lea o le gasegase lea o loo lona lua i le faatulagaina o ma‘i o le kanesa, ae vave tele ona oti ai le tagata pe a lē vave maua ma fai loa i ai togafitiga.
Telefoni le numera (09) 4840253 ma suanoa sa‘o lava i le Susuga Ronny Hellesoe. Mo nisi faamatalaga tāua faafesootai le numera 0800 924 432.
E sili le puipuia nai lo le togafitia!
