Ua sauni le susuga Vaiaoga Leatuvao, 38 tausaga o le matua o le soifua i se faasalaga e aumai e le faamasinoga ina ua suia lana tetee i lona ioeina o moliaga e 14 o moliga solitulafono na ia faia i ni fanau teine sa aooga i le aoga mo i latou e iai manaoga faapitoa o le SENESE.
O le Aso Tofi na tea nei na tulai ai o ia i luma o le tamaitai faamasino o Justice Aitken mo le amatalia o suesuega o moliaga ua ia teena. Peitai na faailoa ai e lana loia le susuga Te‘o Richard Tapeni, le ioeina e Vaiaoga o moliaga e sefulufā a leoleo e aofia ai le fai aiga fai faamalosi, pule lē uma, ma le faaoolima matagā.
O se ioega na faaui ai i tua e loia a le Malo o loo tauaveina le itu a leoleo moliaga e selau ma ona tupu sa faaleoleo alternative charges.
O Iulai o le tausaga e 2013 sa faatulaga e suesueina ai moliaga o lea taulealea sa galue o se faiaoga i le SENESE, peitai na valaau le mataupu e lei oo atu. Na faia sailiga a leoleo i se tusi saisai ma iloa ai, ua tuua Samoa e Vaiaoga mo Amerika lea na faia ai se feutanaiga ma leoleo i le Iunaite Setete ma faapea ona pueina ma toe aumai faapagota ai i Samoa, mo le tali atu i ana solitulafono.
Sa nofo taofia ai i le vaaiga a leoleo talu mai le tausaga ua mavae sa toe aumai ai i le atunuu, lea sa faatulaga ai o le masina nei o Fepuari e valaau ai molimau a leoleo, peitai ua lē taunuu lea tulaga ona ua suia lana tetee i le ioe.
O ni fanau teine sa aoaoina i le SENESE sa faia i ai e Vaiaoga ni gaioiga solitulafono i le taimi o galue ai i le aoga. O se mataupu na teena malosi e le tamaitai Ausetalia sa pulea le aoga. Peitai ina ua oo le mataupu i le Toomaga mo ē Puapuagatia, na faapea ona faataalise atu ai loa i leoleo ma faia ai suesuega.
E toafā tamaitai na aafia e pei ona faaalia e leoleo, lea e afua mai ai moliaga faasaga i le taulealea o Vaiaoga. O le aso 6 o le masina fou o Mati o le a toe tulai ai o ia i le faamasinoga maualuga, mo le tuuina atu o se lipoti mai le ofisa faanofo vaavaaia ma ni folasaga poo finauga faaiu mai le loia a lē ua molia, faapea loia a le Malo o loo tauaveina le itu a leoleo.
Sa talosaga le loia a Vaiaoga Leatuvao mo se faatagaga a le faamasinoga e tatala ai le taulealea se‘i alu e asiasi i lona aiga, a o lei lauina se faasalaga. Peitai sa teena e le faamasinoga le talosaga a le alii loia.
O atugaluga o le faamasinoga ona sa lē usitaia e lē ua molia aiaiga muamua na tatala ai i tua, lea na saili atu ai ua malaga ese ma Samoa ae o loo taoto i le faamasinoga ona moliaga.
E oo mai i le taimi nei e lē o iloa poo fea o agai i ai suesuega i le sailia pe na faapea ona tuua e Vaiaoga Samoa mo Amerika ae o loo taofia lona Tusifolau i le ofisa o faamasinoga i se tasi o aiaiga sa tatala ai i tua.
