E lei faafiti pe faavaivai le tali ale alii faaipoipo ia Faletui Leniu Tuavale i lona tautino leotele i luma ole auvalaaulia ile taliina o fesili ale susuga ile fai faaipoipoga le Aposetolo ia Uilisone Tulua, e faailoa ai lona loto atoa ua ia tuuina atu e tausi ai lana manamea ia Jeanine Rachel Isapela pe a ma‘i.
Ua faama‘ati atu ai i lea osigafeagaiga le naunau tele o le faataoafaiava e fia faatasi atu i lana pele ua ia filifiliaina. Ma o lenei sauniga mamalu sa faataunuuina lea ile malumalu o le Ekalesia Livingstone-Evanglism Ministry i Magele ile taeao o le Aso Toonai 19 o Novema.
O se taeao fou ua totogo ai ata o malama ma ua sulugia ai le aiga fou ise isi sitepu ma le isi laasaga fou ole olaga fai aiga.
O le susuga ile Aposetolo ia Uilisone Tulua mai le ekalesia o le Voice of Christ na faatautaia le sauniga atoa ao faafofoga le mamalu o le auvalaaulia faapea aiga na lua na malaga mai i Ausetalia faapea Samoa aemaise o uo ma e masani sa molimauina lea osigafeagaiga.
O le maualuga ma le aotelega o lenei sauniga Paia o le upu faauuina na saunoa iai le susuga ile faifeau lagolago ole Livingstone Evangelism Ministry ia Tausagafou Ionatana lea sa ia faamalosi ma tapue ai agaga ole ulugalii fou, ole ivi o Atamu oloo fausia ai Eva, ole ivi o ou ivi ma le aano o ou aano, ua fausia ai lau tane.
Ma e lē o toe toalua oulua ae ua tasi i luma ole Atua ona o lea ua fausia ma faavae le aiga e tasi i luga ole papa o Iesu Keriso. O loimata ole fiafia na vaaia i totonu ole malumalu ao agai atu aiga na lua faapea uo ma ē masani e faafeiloai le ulugalii fou ina mae‘a le sauniga.
Na faaauau le matagofie ole aso fiafia ile hall i Malaeola e fiafia uma ai le valaaulia aemaise ai o malo faaaloalogia na malaga mai Samoa e pei ole afioga ile faamasino o fanua ma suafa ia Leaupepe Fatupula ole susuga ia Kalepo Ah Wong ma le faletua ia Susana Ah Wong faapea nisi o susuga i faafeagaiga ma o latou faletua sa molimauina le aso fiafia o Faletui ma Jeanine.
E lē gata i lea sa faatasi mai ai foi le pule ole aufaigaluega ale ACM oloo galue ai le tamaitai faaipoipo.
O faafiafiaga eseese mai aiga na lua faapea le ekalesia ale tamaitai faaipoipo ole Life Healing Church sa fai lea ma alofaaga molimoli mo le aiga fou, ae taualuga ai loa i faaaloaloga e pei ona masani ai aso faapenei.
Ole tofa ia Feagaimalii Leota Tautu sa tu tootoo ma o ia foi sa fai ma Fofoga ole aso, ae ole susuga ia Seve Ioane Tafalesolo sa fai ma sui ole ekalesia e talifuaitau ile totoo ole aso.
O Faletui Leniu Tuavale e mai le afioga o Faga ma Faletagaloa i Safune ae oloo galue i luga o vaa i Italia, ae o lana manamea ia Jeanine Rachel Isapela Ah Wong ole alo ole susuga ile faafeagaiga ia Tafuamaseafa Pua Ah Wong ma le faletua ia Rasela, e mai le alalafaga o Vailoa Aleipata, Sapoe Falealili, Vaimoso ma Moamoa, ae oloo galue nei ile ACM i East Tamaki.
