E lē fesiligia le galogalo o mea, ina ua palasi faalua, ma tau faatū i luga le alii fusu malosi mai Amerika, ina ua lavea i pomu malolosi a le alo o Samoa, Joseph Parker. Sa galo ia Minto o Niu Sila lea na faia ai le fusuaga, galo ma lona tuatusi poo le mea e nofo ai, ae lē taumate, sa galo foi ma le atunuu e sau ai.
E lē gata i lea, ae na faamaonia foi i lipoti a le aufaasalalau ma le autusitala, le gau ai o le isu o Minto i le taamilosaga lona lima. Sa ia iloaina, le mutaaga o le taaloga ina ua mae‘a ona aafia i lea manu‘a a o faia le taaloga.
Sa taumafai pea o ia ina ia faaauau le taaloga, peitai sa lē mafai ma sa ia manaomia ai le tatau ona togi le solo, ma lafoai auupega a o lei toe lavea, ma toe palasi ai i le taamilosaga lona fitu, ma taofia ai lona ma le fusuaga.
O le tele o faamatalaga sa faalele a le alii fusu Amerika, Brian Minto, a o lumanai ai le la fetauiga ma le alo Samoa, Joseph Parker i le faaiuga o le vaiaso na tea nei, ua faatoa manino ai nei le mata o le vai, ua na o ni faamatalaga tau faafefe, ma le loto tele faavalevalea, ae sa nanā ai i totonu le mata fefe ma le palaai.
O le faia‘ina o Brian Minto, o le numera sefululua o le lalolagi, ua matala ai nei ma le faitotoa mo Parker, i nisi o alii iloga o le taaloga, ua tatau ona agai i ai. E lē gata i lea, ae o se tulaga lelei foi mo lona taumafai i lenei vaitaimi, i le vaai ma le silasila a le au fai fusuaga, ma le Asosi Fusu a le lalolagi atoa.
O loo ua umia nei e Joseph Parker le fusi o le WBO, e pei ona ia manumaloina mai le alii Siamani, ma o lea foi ua toe faasee ane i ai ma fsui sa umia e Minto e pei o le WBA PABA.
O se taimi e lē o toe mamao, ona faailoa lea, o le isi paga o loo sauni mai mo Parker, ma e iai foi le talitonuga o Amerika, o le a faia ai le isi fusuaga a le alo o le atunuu.
O se fiafiaga i le alii Niu Sila, Kevin Barry, le taunuuga o le taaloga sa iai i le faaiuga o le vaiaso. Sa ia muai faailoa foi i talanoaga ma le aufaasalalau, ma le autusitala e faapea, o Parker e laitiiti ona tausaga, ae o ia o se tagata ua matua i le taaloga.
E lē gata o se fiafiaga ia Barry, ae talitonu o se oliolisaga foi lea i le tapuaiga a Samoa, le pa‘ū ai o le isi toa Samoa i le taaloga, a o lea foi ua toe tulai mai le isi toa, o se tamafanau foi a le atunuu, e faaauauina le moemitiga lava e tasi, ina ia taunuu.
E manatua pea se talanoaga a le Samoa Times, ma lenei alo o le atunuu i le tausaga 2012, a o tau atiae lana taaloga, ma taumafai malosi i ni ona avanoa e taalo ai faapolofesa. Sa fesiligia sona lumanai, ma lona soifua naunau i le taaloga.
Sa fesiligia foi poo ai se tama fusu, o loo fai ma vaaiga ma maa tulimanu i lana vaai i le taaloga lava o faipelega. A o lana tali mai, e fia pei foi o le isi fetu pupula, David Tua. E lē taumateina, o loo mulimulitai pea Joseph Parker i lea moemitiga, ma le faanaunautaiga, ia ausia i se taimi, le tumutumuga o faiga mea a le lalolagi i le taaloga o fusuaga.
E lei manuia le taumafai atu mo se feiloaiga ma le alii taalo i le amataga o le vaiaso, mo se talanoaga lata mai, ma le faitau a le atunuu, peitai o se tulaga o le a tulituliloa pea, seia maua sana faamatalaga tuusa‘o mai o le tapuaiga a le atunuu, a o tapena ai mo le isi taaloga o lumanai.
