O nai masina e lei mamao atu na faaopoopo atu ai ile Minisita o Leoleo le afioga Sala Fata Lisati Pinati le vaaiga ole Pulega o Tagata Tafafao mai fafo.
Ole sootaga malosi lea ose finagalo ole sui ole Malo tamaitai ole afioaga o Leauvaa e tatau ona galulue faatasi uma le pulega a matai male lautele ole nuu e fai se galuega e faailoa ai le latou lagolago ile Malo ile atinae o tagata tafafao e ala ile faamatagofie ole afioaga i lona aai.
“O lea ua e silasila nei ile galuega oloo faatupe lava ele nuu ona ole fia lagolago ile matou tofi faipule ua avea nei ma minisita o tulisi.” Ole finagalo lea ole tofa Vaifale Iose ose tasi o tulafale faiupu ole nuu ua ia faamatala le tulaga ole galuega male faamoemoe e tatala aloaia uma nei taumafaiga ile faaiuga ole masina nei o Oketopa.
“O lea la e silafia ai nei e tasi lava le pulega ole nuu lenei e lē lua ni faiganuu”. Ole finagalo o Vaifale Iose e faasino ini mataupu sa salalau ai tala ma lipoti feaveai ua vaeluaina le nuu ma ua lua faiganuu. Ole po e ki ai moli ma ua ese ai le silasila ale atunuu feafioai mai Sisifo i Sasa‘e aemaise tulisi ma malo tafafao mai fafo i totonu o Leauvaa. Fai mai se tasi o tamalii e masani ona malaga mai i faalavelave faaleaiga na ese lana silasila ina ua oo mai le taavale i Leauvaa ina ua silasila atu ile pupula mai o moli ile po faapea lava ia ose isi lea malaevaalele ua toe tulaueleele iai.
Faaalia e Vaifale na amata le galuega sa tagi lava i lima i saogatupe a matai peitai o lea ua iai se avanoa ua mafai ai ona fai se aitalafu ise tasi o kamupani ua alu atu ai le faatau o mea uma oloo faaaogā e pei o sima ma isi totoga.
O lalo o ‘ulu o lumafale ai nisi o laoa ma maota ua sima faatamilomilo, ua tutū pou sima ma molī ua faatutū ai, ma ua vali foi. Ua iai foi pa uaea uamea ua tuu lelei ai lapisi e faatali le loli lapisi e aveesea ai.
“O itu uma ia ua tapena iai lenei galuega ona ole naunau e faamatagofie le aai, ma oloo fuafua foi a maua lava nisi seleni ua vali lanu tasi uma ‘apa o laoa ma maota ina ia maua le mea silisili ile maimoa ale atunuu ma tulisi malaga mai ilo tatou atunuu”, na fetalia ai Vaifale Iose. Sa asia ele tusitala nisi o vaega ole nuu ile agai i totonu male alu i uta i nofoaga oloo alala ai nisi ole nuu.
E matagofie foi le galulue o aiga o Leauvaa ona ole ola o faatoaga aemaise o togalaau ‘aina e pei o maukeni. Faaalia ese tasi o tamalii ole nuu o lana maukeni a oo ina fua ma la‘u e faatau e fiu e luluu le tupe i vaiaso uma.
Ole isi lea tulaga lelei i galuega a matai oloo pulea lenei afioaga ole atunuu ona e lē o oge se aiga ise taumafa. Faaalia e Vaifale Iose ole leo faifai pea lava lea o alii ma faipule i aso uma ole toaaga e galulue e faato‘a le laueleele ina ia aua ne‘i maua se isi ile fia tausami pe ola falolo tupulaga ole nuu.
