E limasefulu miliona tala Amerika le tau aofai o galuega o le a toe faaleleia ma toe fausia ai fale ma nofoaga o le malaevaalele faavaomalo i Faleolo. O se galuega tele lenei o le a faatupe e le Malo o Saina i se nonogatupe e māmā le tului. E ese le galuega lea ma le isi galuega e faatupe e le Faletupe o le lalolagi e agai tonu i le toe faaleleia o le malae poo le runway e taunuu ma o ese ai vaalele.
O le amatalia o lenei galuega ua faailoa ai e le afioga i le Palemia o le a lē toe timu‘ia ma lāina ai pasese pe a malaga ese pe taunuu foi. O le a fausia nofoga e sau lava le vaalele pipii i le vaega e agai sa‘o ane ai pasese ma taunuu i le fale mo le siakiina o pepa malaga ma siaki a latou ato ma uta. E faapena foi i le taimi o le a malaga ese ai ma Samoa. O lona uiga pe a silasila i le ata o le galuega o loo faaalia i lenei lipoti, o le a pei lava Faleolo o malaevaalele tetele i Niu Sila ma Ausetalia ma Amerika, lea e taunuu atu pasese agai loa i le fale e lē tau savavali muamua i fafo taunuu i luga o le malaevaalele ona faatoa ulufale ai lea i le vaega e siaki ai pepa malaga ma uta.
O le faaiuga o le tausaga ua mavae na feiloai ai le Pelesetene o Saina ma taitai o le Pasefika lea na faailoa ai e lea taitai se fesoasoani a lona Malo. O le fesoasoani lea na auala atu ai le talosaga a Samoa mo le toe fausia o le malaevaalele i Faleolo. O le faatinoga o le galuega ua ave ai i le konekarate faufale a Saina o le Shanghai Construction company latou te faia. O se konekarate ua tele isi galuega o fesoasoani a Saina ua na fausia i Samoa ae ua latou maua foi nisi o galuega tuma‘oti e pei o le fausia o Malumalu ma faleaoga.
O le a ausia e Samoa o se isi tulaga maualuga i lona malaevaalele faavaomalo pe a mae‘a le galuega o le a faatino nei e lea konekarate mai Saina, o le a fetaui ma le oo atu i ai ua taoto nisi fuafuaga mo le faateleina o malaga a vaalele mai isi atunuu e afea Samoa mo le siitia ai o le atinae o tagata tafafao mai fafo.
E iai le matega e oo atu i ai i lena taimi ua taoto se faaiuga i le lumanai o le faaipoipoga a le Polenisia ma le Virgin Australia e pei ona faaalia e le Palemia o loo iloiloina i le taimi nei pe ua tatau ona faaauau pe ua tatau loa ona tetea.
O Iuni o le tausaga nei sa fuafua e le Malo e toe amata ai ona lele le Polenisia i ana malaga faavaomalo i Niu Sila ma Ausetalia e ala i le faaaogā o se vaalele o le kamupani vaalele a Solomona e faia ni malaga togipau.
Peitai e lē o iloa poo le ā se tulaga o iai lea fuafuaga. Ua na o lipoti na ta‘ua ai le oo o se fautuaga i le Malo ina ia seu silasila lea fuafuaga i taimi o pulea e le Malo le Polenisia sa aliali mai ai ni tulaga faigata tau tupe. Ua faailo mai e le Palemia o se isi lea o vaega o loo agai i ai iloiloga o loo faia i le faaipoipoga a le Polenisia ma le Virgin. Mo le malaevaalele i Faleolo, o se isi lea fuafuaga ua sili ona toatele le atunuu ua faaalia lo latou fiafia pe a oo ina tino mai, auā o le a faaleleia atili ai lea tautua mo le atunuu aemaise o tagata tafafao mai fafo faapea taitai o isi Malo tetele e faimalaga ma afea Samoa.
