“O le mafuaaga lava o le lē lava o fesoasoani mai le Malo”…Pelesetene Aoga Amata
Ua folafola e le Afioga i le Minisita o Aoga, Taaloga ma Aganuu o Magele Mauiliu Magele, o le a ausia e Samoa le tulaga selau pasene o fanau laiti e auai i Aoga Amata i le isi sefululima tausaga o lumanai.
O le finagalo o le minisita na afua mai ona o faamaumauga a le UNESCO ua ta‘ua ai o Vanuatu le atunuu o le Pasefika o loo maualuga lona tulaga i le Pasefika i le atinae o Aoga Amata poo Preschool e 61 pasene, ae o Samoa e maualalo tele lona tulaga e 34 pasene. O lona uiga e lē o lelei le atinaeina o Aoga Amata i le tulaga o le tuuina atu i ai o fanau laiti aemaise o vaega o loo faaaogā mo le aoaoina o fanau. O tausaga pito tāua lea o fanauiti e pei ona faaalia e le Minisita o Aoga, Taaloga ma Aganuu, o le taimi o Aoga Amata auā ua amata ai ona faamasani le tamaitiiti i le olaga aoaoina.
O lea ua iai nei se Tusi Taiala e faatonutonu ma pulea ai le faagaioia o Aoga Amata e silia i le selau ua lesitalaina faaletulafono i Samoa. O se tusi taiala na saunoa le Minisita le afioga Magele Mauiliu Magele, o le sini ia ausia e Samoa le selau pasene o le siitia o Aoga Amata.
O le finagalo o le Minisita e lagolagoina e le Pelesetene o le Faalapotopotoga o Aoga Amata a Samoa le faletua o Kuinimeri Tamati, ae na faaalia e le peresetene e tele vaega o loo manaomia ai le lagolago atu a le Malo.
Muamua o totogi o faiaoga ma seleni e faaleleia ai faleaoga ma isi meatotino o loo aoaoina ai fanauiti. O le mau a le peresetene pe ana lava tupe e totogi ai faiaoga ua iu mai le Aoga Faafaiaoga mo Aoga Amata semanu e toatele faiaoga e galulue.
Peitai o le isi lea o faafitauli o le lē lava o le faasoa tau tupe a le faalapotopotoga. O seleni foi i fesoasoani mai le Malo o loo maua i tausaga taitasi na tautino mai le faletua o Kuinimeri e lē o fea‘ua‘uta‘i ai lava le faasoa a Aoga Amata. O taiala ua faailoa i le Tusi ua mae‘a ona faalauiloa na ta‘ua e le peresetene e matagofie tele ma e mafai ona ausia i le isi lima tausaga se tulaga maualuga pe afai e foia nisi o faafitauli o loo faavaatu‘ia ai le sologa lelei o polokalame a Aoga Amata.
Na ta‘ua e le peresetene ua iai se fuafuaga o le a amata ona totogi e le Malo faiaoga mo Aoga Amata i le tausaga fou, peitai e lē o iai se silafia o le Pule Sili o le Matagaluega o Aoga, Taaloga ma Aganuu i lea tulaga.
Faaalia e le afioga Matafeo Falanaipupu Tanielu Aiafi, e lē o iai se fuafuaga faapea peitai e lei oo atu se faaaliga ia te ia e tusa ai o le finagalo o peresetene o Aoga Amata na faailoa ane i tusitala e tusa o le totogi o faiaoga.
O le faletua le afioga Leatuavao Ruby Vaa, na faauluulu i ai se komiti sa latou soalaupule ma tapenaina le Tusi Taiala mo Aoga Amata ua mae‘a ona faalauiloa (launch).
O lana faamatalaga i le sauniga na faalauiloa ai lea tusi e lei faigofie le latou galuega, ae o le itu sili ona faafetai ai, ua ausia ni taiala o le a amanaia ai Aoga Amata i Samoa i le tulaga faavaomalo, ina ia tutusa ai ma auala ma faiga o loo faagaioia ai ma pulea Aoga Amata i isi atunuu o le lalolagi e pei o Niu Sila ma Ausetalia o loo sili ona latalata mai ia Samoa.
