E ui lava ua mae‘a le taimi o meaalofa o le sunami ae lē mafai ona uma ai le alofa foai o le malo faasetete o Kuiniselani e pei ona toe tuuina fua mai ai le container e 40 futu le umi, e auina atu mo Samoa e aofia ai ma le tau e totogi i le lafoina atu i le vaa.
O fesootaiga na faaauala mai le ofisa Multicultural Affairs – susuga ia Ati Mamoe, ae faagaioi uma e le Komiti o le Tsunami fesootaiga e ui mai i le faletua ia Uo Alaalatoa Brown ma Sara Brunt.
O donations mai faalapotopotoga eseese, mea totino e faaaogā i faleaoga mo a‘oga a tamaiti ma nisi vaega e faaaogā i falemai e pei o wheelchairs aemaise le tele o meaalofa sa mafai ona faatumuina ai lenei container ua lafoina atu nei i Samoa.
O le loli na fesoasoani malosi ma agalelei mai i le aso atoa e kiliva ai ma piki mai uma mea mo le container o le Leu Liu Transport i Brisbane lea o loo faafoeina e le tofā ia Taliaoa Fania, o le tama o le laumua o Tumua mai Afega.
O le tofa ia Taefu Patea ma le faletua ia Tina faapea le faletua ia Lemalu Patricia Sevele o le Sina World Travel & Imex o nisi nei o sui o le komiti faatasi ai ma nisi sa fesoasoani malosi. Sa ofoina mai e le susuga i le faafeagaiga EFKS Brisbane Rev Milo ma le faletua ia Talamasinei Faaleava le fanua o le galuega poo le lotoā ua faatauina ai le malumalu o le ekalesia mo lea faamoemoe, faatasi ai foi ma le laua fesoasoani e soosoo tau‘au ai i le galuega.
O nisi sa iai le agaga fia fesoasoani ma foai, o le susuga ia Carl Toma Mgr.CDP – Forest Lake…Rosie ma Brendan Whyte…Petrie, Peter McGovern – Algester…Logan Hosp-Supply Dept, Nadas Siulepa – Qld Police Logan, Tala Aufa‘i – chaplain – Browns Plains State High, Dunami Christian Centre Citywest…aemaise le tele o school furniture mai le Richlands State Primary Inala ma isi meaalofa mai faalapotopotoga.
O lea container o le a taunuu ma faamautu i le afioga ia Tuatagaloa Joe Annandale i Poutasi Falealili.
E momoli ai le faafetai ia i latou na lagolagoina ma fesoasoani mai le Komiti o le Tsunami i Kuiniselani mo le faamae‘aina o lea foi fesoasoani sa toe tuuina mai. Ia faamanuia tele le Atua!
