E $5 miliona tala Amerika ua faamatuu mai e Malo Aufaatasi e pei ona faatupe e Niu Sila, Ausetalia ma le Iuni o Europa mo le faamalosia o fesootaiga a tagata o le Pasefika ma le faasoaina o tupe, le teuina o tupe ma tupe faamomoli. O le Pasefika ua ta‘ua e se lipoti a Malo Aufaatasi e aupito i maualuga le numera o tagata o loo iai e lē o iai se avanoa e maua ai auaunaga tau tupe ona o le itu lea e vavamamao motu ma taulaga e iai nei auaunaga ma e toatele lava e lē o iai ni galuega e faamalosia ai le faia o Teugatupe i faletupe ma o le toatele o i latou i nuu i tua o nei atunuu laiti e faamoemoe tasi i tupe faamomoli mai i aiga mai i fafo auā le tupe maua ma le tausiga o i latou i lea aso ma lea aso.
O le fesootai la ma tulaga tau i Teugatupe, o le nonō o tupe, o le fai o inisiua poo le saili o auala taugofie mo le aumai ai o a latou tupe faamomoli, o ni gaioiga e lē masani ai. O nei faamaumauga ua ta‘ua ai e na o le 10 pasene lava o le faitau aofai atoa o le tagata o loo nonofo i atumotu laiti o le Pasefika o loo maua nei auaunaga. Peitai ua tele tomai ma fesootaiga televavave faaonapo nei ua vaaia i le Pasefika e pei foi o Samoa e pei ona iai le telefoni feaveai ma o le auala lenei ua vaaia ai le toatele o tagata ua mafai ona fai Teugatupe ma soo se fesootaiga o tupe i luga o nei telefoni. O le faafetai lea a Malo Aufaatasi i lona sui e pei o le susuga Helen Clark ona o lana mau, a mafai ona maua le tomai o tagata e faatino ai soo se gaioiga i le itu tau tupe o le a tele foi le avanoa e see ese ai mai le ola mativa ma le lē tagolima.
O le $5miliona tala Amerika ua faamatuu atu o le a laasia ai loa le vaega lona lua o lenei atinae ina ia oo atu i le tausaga e 2019 ua oo atu i le miliona le numera o tagata ua maua auaunaga tau faletupe. O loo avatu i faletupe Tutotonu o le Pasefika ma faletupe e pei o le Westpac Bank ma le ANZ Bank le tiute o le faasoa lelei o lea seleni i atinae laiti e mafai ona maua e i latou e talosaga ina ia faamalosia ai le umia o le tusitupe ma amata ai loa fesootaiga e pei ona unai i lenei atinae. Ta‘ua e le tamaitai Kovana o le Faletupe Tutotonu a Samoa, o le vaega muamua o lenei taumafaiga na iloga le tele o le suiga na vaaia ai auā ua mafai ai ona faamalosia tulafono i Samoa lava ia e faatino ai atinae laiti ma amata ai tusitupe a nisi o aiga.
E le gata i lea ua fai ai aoaoga ina ia mafai ona iai ni tusitupe ma faagasolo ai le faatinoga o le nonō ma le toe totogi o nonogatupe, ua aoao le atunuu ina ia mafai ona malamalama i le faaaogāina o auaunaga nei mo atinae laiti ua o latou faatuina i lalo o lenei polokalame ma ua iai ma le faamoemoe o le isi lua i le tolu tausaga ua faamalosia aoaoga tau i le malamalama i tulaga tau tupe (finance literacy) i polokalame o aoaoga a le fanau. O le taimi lenei i le mae‘a o le vaega muamua o lenei taumafaiga ua oo atu i le 700 afe le numera o aiga i totonu o le Pasefika ua maua le avanoa e amata ai Faaputugatupe ma faatautaia fesootaiga e pei ona ta‘ua e faaleleia ai tamaoaiga o o latou lava aiga.
