E silia i le 300 le mamalu o le atunuu na auai atu e lagolago le faamoemoe o le SVSG Auckland i le po o le Aso Toonai ua mavae, i le Dream Center i Manukau. O susuga i faafeagaiga ma o latou faletua, o sui o kamupani taitasi ma le loaloa o le atunuu na faatasi atu e tuu atu lo latou tauau e tausoa faatasi ai le faamoemoe e pei ona alo atu i ai le mafutaga i Niu Sila nei.
Sa faapea foi ona auai atu i ai le konesula o le malo o Samoa le afioga ia Faolotoi Reupena Pogi ma le faipule o le itumalo o Magele le tofa Su‘a William Sio. E toavalu sui mai Samoa na malaga mai lea sa taitai mai e le susuga i le tamaitai peresetene ia Lina Chang faapea sui mai i afioaga taitasi.
E toafitu sui mai Ausetalia e aofia ai ma le latou faatonusili ia Cecilia Theodore ma le toalua mai Kalaiesete le susuga i le faafeagaiga ia Jeremy Faumuina ma lona faletua. Na vaaia foi nisi o sui o tagata papae poo palalagi sa iai i le lagolagoina o le faamoemoe. Ae o le auga ma le autu o lea po, o le Dinner e sailia ai se seleni e fesoasoani ai i le Toomaga i Samoa.
O le 6.30 i le afiafi na amata faafiafia ai le faili a le susuga ia Willie Tavita Trio ma ona alo ma tatala aloaia ai foi ma faitotoa mo le mamalu o le atunuu.
Na muamua lava momoli laau i fogaa o le viiga ma le faafetai i le Atua lea sa avea ai le susuga i le faafeagaiga ia Chris Sola ma ositaulaga.
O le afioga i le taitaifono ia Taliaoa Filipo Tipoai na faafeiloaia le mamalu o Samoa potopoto ma tuu atu ai loa i tootoo filifilia o le po na te faasoasoaina le polokalame, le susuga ia Tanoai Reupena Tanoai o ia o le taitai o le Samoa Catholic Taimua Youth Group, ma le tamaitai sa avea ma tausala o Samoa ma le Tausala o le Pasefika i le 2012-2013 ia Punipuao Janine Tuivaiti.
O failauga filifila o le po, o le afioga i le faipule ia Su‘a William Sio, Phillip Recordon, Konesula o Samoa Faolotoi Reupena Pogi ma le faatonu o le SVSG i Aukilanai le afioga ia Peseta Levaoatuamaaana Aati-Schuster na saunoa i le tala otooto o lenei faalapotopotoga.
Sa faapea foi ona iai nisi o ausiva sa faafiafiaina le mamalu o le atunuu ma ua matagofie ai le taliga o le sua i lea afiafi. O nisi o vaaiga mataina sa iai, o le tauvaga puletasi mo tina ma tamaitai a o le alo‘a mo alii, lea sa faamasino ai le susuga ia Leilani Jackson, Catherine Tito ma Laura Jackson.
O le po foi lea sa ofoina ai e le afioga ia Galumalemana Tai Galumalemana ma le faletaavale o le G-Mana le $1000.00 mo le SVSG Samoa i masina taitasi i tausaga e lua, ma le Sao Timaloa Barrister & Solicitor foaiina le $100.00 i masina uma faapea le Warehouse ua ofoina ni lavalava seevae ma meaaoga mo le aoga a le Toomaga i Samoa ma nisi o le atunuu ua faatoai lo latou fesoasoani i le SVSG i Samoa.
O le afioga i le taitaifono ia Taliaoa Filipo Tipoai na saunoa e faafetaia le alofa o le atunuu faapea nai tagata palalagi ma kamupani sa taupati atu e lagolago ma opogi le faamoemoe, ma o le avanoa foi lea sa tuulima atu ai ma le siaki tupe e $30,000.00 i aao o le Peresetene o le Toomaga i Samoa le susuga ia Lina Chang ma faaiu ai loa i le pese Lota Nuu ma tatala ai loa le filialii.
E 78 sui ua resitalaina i totonu o le SVSG i Aukilani, e aofia ai le laulau o le Peresetene ia Peseta Levaoatuamaaana Aati-Schuster, Taitaifono o Taliaoa Filipo Tipoai, Failautusi o Mari David ma le Teutupe o Catherine Tito ma Peter Parsons, o nei sui uma o loo galulue i nisi o a latou galuega tumau, ae ua ofoina lo latou soifua e auauna ai i lenei faalapotopotoga mo le Toomaga o ē Puapuagatia i Samoa.
