Ua faaauau lava ona suesue e le faamasinoga moliaga e silia ile sefulu oloo molia ai le afioga Tuala Iosefo Ponifasio sa tauva mo le nofoa o Gagaemauga numera tasi ile palota tele ole 2016.
Ole palota tele lea ua mafua ai moliaga ua faasaga i lea tamalii ole Itumalo ona o tuuaiga o lona faia oni faatosina solitulafono e ala ile ave o tupe ini tagata palota. E toalima tagata palota oloo faauluina le tagi o solitulafono faasaga ile afioga Tuala ma oi latou ia na muamua valaau a latou molimau.
E lua selau tala na faaalia ele molimau muamua na avatu ese sui ole Komiti a Tuala ina ua faia se fonotaga ale sui tauva i Malifa ise aso ole masina o Aukuso ole 2015, a o lumani le palota tele na faia ile masina o Mati ole 2016.
Fai mai le molimau na faailoa ai foi e lē ua molia lona ave oni tagata palota ini galuega tau‘apu i Niu Sila. Ole molimau foi lea a se tasi o taulealea e faapea sa iai ile fonotaga lea ma sa avatu ai lana selau tala ele sui faatu.
Na ta‘ua foi ele molimau sa ia faalogo ile saunoaga a lē ua molia o faailoa foi le maua o ni galuega tau‘apu i Niu Sila. E oo mai ile Aso Faraile ua mavae atu nei o faaauau pea ona valaau molimau ale itu tagi ma o tupe lava na latou faailoa ile faamasinoga na latou maua mai ile sui faatu ma lana komiti.
Oloo faaauau pea le suesueina o molimau e 14 ale itu tagi ae 20 molimau ole a valaau e lagolago ai le tetee ale afioga Tuala i moliaga. Ole talosaga na tuuina atu ele loia ale itu tagi mo se puipuiga o molimau e toaono ale itu tagi ua teena.
Faaalia ele afioga ile tamaitai faamasino o Talasa Atoa Saaga oloo faatautaia le faamasinoga lenei, e leai se malosiaga faaletulafono ole faamasinoga o soligatulafono e tuuina atu ai se puipuiga mo ni molimau e ono toe molia pe a faamaonia ni tuuaiga ole oloo molia, ae ua na ole faamasinoga o faigapalota e iai lea malosiaga faaletulafono.
Ua na ole pau lava lenei ole tagi o tuuaiga e mafua mai ile palota tele ole 2016 ua faaauau lava ona suesueina, ae o isi uma tagi sa faaulu ile faamasinoga o palota, ma le faamasinoga faaitumalo ua toe ave uma i tua ina ua mafai ona soalaupule itu na aafia.
Ole mataupu lenei faasaga ile afioga Tuala Iosefo sa lē mafai ona suesueina ile tausaga ua mavae ona e iai sootaga ole faamasino na muai seei ile mataupu le afioga Fepuleai Ameperosa Roma.
Sa iai se taumafaiga a nisi o matai ma tagata palota sa lagolagoina Tuala ile palota tele ua mavae e seumalo se isi itu ole itumalo ina ia lē taunuu ona suesueina moliaga. Peitai ina ua toe faaauau le faamasinoga ile Aso Tofi ua mavae e leai se isi o matai na tulai ane e faatino le seumalo.
Na faaalia ese molimau faatuatuaina na faia se Ifoga ma ave foi se seleni ma ie tetele ini matai ole itumalo i Leauvaa peitai e lei talia. Na ta‘ua foi ele molimau na oo lē ua molia ma nisi o lona aiga ile Faipule ole itumalo ma ave iai se tuualalo ma faaololomaau e alofa e ave i tua le tagi.
Peitai na faaalia ele molimau e lua selau afe tala na fautuaina ai lē ua molia e avatu ona faatoa tatala lea ole tagi. “E leai se tupe faapena o iai ma ole mafuaaga lena ole faaauau pea ole mataupu”, na saunoa ai le molimau faatuatuaina.
E lei maua le faipule mo sona finagalo ona na ta‘ua ese molimau ua malaga ese ma Samoa mo se siiga gasegase a lona aiga i Niu Sila.
