O tupe ia ua faasolo ile $300miliona tala, oloo faaputuputu lava e le malo, ua tuai ona faaaogā, ae oloo siisii pea lava i luga le tau o galuega fai i lenei vaitaimi, e aofia ai ma galuega na faaagaaga iai ia vaega tupe mai fafo, mai le faletupe ole lalolagi, faletupe o atinae a Asia, ole faalapotopotoga a Malo Europa, Iapani, Ausetalia ma Saina.
Peitai ile fono ale Palemene talu ai nei, na laga ai ele faipule o Palauli le Faleafa, Faumuina Liuga popolega “ona ole a tuai ona faatino galuega, ma e faasolo ina taugata.”
Ole agaga foi lea ise tasi o saunoaga ale Palemia, ile vave faatino o galuega auā ole umi ona tuu, ole taugata foi lena.
Na talanoa Faumuina, “ua lima tausaga e lei faia le auala lea, lima tausaga e lei faia Vaisigano, ae ole a faasolo ina taugata, ona ole tuai faatino. E lē ose faaseā ae ole faamanatu, ae avatu ai le fautuaga e silasila iai, ia tatou tupe o totoe pea. Ua faasolo ile $300miliona tupe faatuputupulaia mai tausaga e tolu ua te’a.”
Manatua foi ele aufaitau: Ole Susuga Papalii Niko Lee Hang, oloo avea ai nei ma Minisita o Galuega.
Ae o Faumuina Liuga, ole faipule o Palauli le Faleafa sa ia tauavea mai lea tofiga Minisita o Galuega i ona foi taimi.
E lei tuumamaina e Papalii lafoga a Faumui na, “Sa ou manatu lava, ole sui (Faumuina) ua fai si leva o fai ma sui ole Kapeneta, ae foliga mai e lē o malamalama ile tapenaga o galuega tetele pei o auala.”
Ta’u e Papalii mafuaaga ole taua’i fai o galuega o auala
“Ole faatuai ona faatino o galuega lea e ta’ua ele sui mamalu, ona o tulaga lē ma’alofia. Talu ai o tapenaga o galuega ia mai paaga, e iai le faasologa e sosolo ai ma oo atu ai lava i tulaga le ma’alofia. Talu ai e iai foi aiaiga o tupe poo fesoasoani mai fafo.
Ole Ata poo le fuafuaina ose galuega, e muamua tapena iai galuega faapenei, e tapena e kamupani mai fafo, fautuaina mai e le vaega o maua mai ai tupe, ae a avatu ae iai ni suiga, e toe alu foi se taimi o faatali mea nei.
Finau Faumui ile ese ole mafuaaga ole faatuai o galuega
“Sa ou tulituli loa le Sui Peresetene ole Faletupe ole lalolagi ina ua uma ona aumai tupe ia, i galuega ia e lua ile faaiuga ole 2013, ae fai mai le tamaloa ua leva ona aumai le talosaga ia tatou, e avatu le term of preference, tagata e tusia ata. Ae fai mai le LTA, e fai e le PMU, ae leiloa poo fea o iai le PMU. O fea gi mea ua faapenei?
“O i e mafua ai le tuai, ae le ole design, ole tuai ole leai ose term of prefference” pei ona finau mai Faumuina.
Tautuua’i faipule ole HRPP ile tuai faatino o galuega o auala
E manatu Papalii, “lea ole a ou talanoa ile delay, matau foi ua lima tausaga, ae na e (Faumuina) saofai ai ii o tapena mea ia, auā o lea e fai mai na e talanoa ile peresetene ole world bank, ae aisea na lē faia ai?”
Folafola e Faumuina, ana oo mai nei o avea lava ia ma Minisita, “semanu ua uma mea ia. Ole amataga lea ole aumai (saili) o tupe, ole aoga lea o a’u ole aumai o tupe, ae ana ou iai ile taimi nei ua uma mea ia.”
Na toe ‘au ato atu e Papalii, Faumuina e “onosai se’i fai le matou galuega.”
Aua ole faagasologa ole faiga o galuega, e tatau ona faamalieina uma lava, ona faatoa maua mai lea ole tupe. Pei ole faata’ita’iga, sa le mafai ona gafatia e Samoa le tolu mita e faalautele ai le auala, ae na’o le lua mita, ma toe faia ai foi le isi fetuunaiga, ma afua ai le isi faatuai, ile faiga o feutanaiga.
Talanoa Papalii, “ua faagaosolo ai nei tauofoga ole auala ile agai atu i Sisifo, pe tapuni ise aso ole masina fou, ae ole tulaga lea nei faaseseina le faafofoga mai ale atunuu, fapea ua miliona tupe o taatitia, ae sa’o oloo taatia mai ile tatou tala ile tupe i tausaga uma e lē o faaaogāina auā ua pasia e le tatou malo mo galuega ia. Ae se’i faatino ma fai galuega, ona to mai loa lea o tupe ia, oloo taatia i tupe ale malo.
O tupe oloo e talanoa ai e sa’o, e faitau miliona, e faagaga mo galuega nei, e le puupuu se taimi e faatali ai.”
