Ua finau le loia a le Komesina o leoleo o loo faamalolo lē tumau, le tamaitai o Diana Peters Roma, e leai ma se vaega o aiaiga o le tulafono faaleoleo ua solia ai ni tiute o le Komesina e tusa o tuua‘iga mai nisi sa molimau i le suesueina o faaletonu i le falepuipui i Tafaigata faapea nisi o mataupu sa laga mai i le pulea o le matagaluega o leoleo ma falepuipui.
O le folasaga a le tamaitai loia na tolaulau ai nisi o tuua‘iga autu sa fesiligia ai e le komisi suesue le komesina e pei o le inupia o leoleo i le lotoā i Tafaigata, lē lelei le tiute i le vaaia o le alii Niu Sila o Hans Dalton maliu i le falepuipui, lē lelei le vaaia o le alii Nigeria o William Okoro, nofo ese o se pagota i se fale o loo nonofo ai leoleo o le falepuipui ma tuli lona faasalaga ae lē nofo i totonu o potu o loo loka uma ai isi pagota, le lē lelei o auala e filifilia ai leoleo ma le faia o promotion poo le siitia o tulaga o nisi o leoleo, atoa ai ma nisi o mataupu.
E tasi lava le aotelega o le finauga a le tamaitai, ua uma ona tali le komesina ma faamalamalama ai ia vaega, ma e lē o iai ma se aafiaga o ona tiute pe aveesea ai foi le faatuatuaga o tagata lautele i lona tauaveina o le tofi Komesina poo le faauluuluga o le matagaluega o leoleo ma falepuipui.
O le folasaga a loia sa faufautua i le komisi sa faaalia ai e le tamaitai loia o Sine Lafaialii Koria, o tali tuufofoga ma molimau a le komesina ua ioe ai i le lē lelei ona faatino nisi o tiute o leoleo e tusa o mataupu autu sa fesiligia ai mo sona finagalo. O le aotelega foi o lana folasaga e iai vaega na faaletonu ai le tiute o le Komesina o ia o le faauluuluga o le matagaluega.
O se tasi o faaletonu o le maliu o le alii Niu Sila e aafia i le gasegase o le mafaufau o Hans Dalton, ona sa leai se faaiuga lelei ma mautu na faia i le pule o le falepuipui e pei ona faaalia e le komesina e leai ma se molimau na tuuina atu i suesuega na faia e tuuaia ai le faauluuluga o le falepuipui le komesina lagolago ua faamavae le afioga Sala Seaga Uili Lafaele. O le leiloloa o meatotino a le alii Nigeria o Okoro, o le tasi lea itu na lape ai tiute o leoleo ma e pa‘ū i le komesina o leoleo o ia o le komesina. O le mau tauave lea a loia o loo faufautua i le komisi suesue, e iai faaletonu na tulai mai ma aafia ai le faatuatuaga o tagata lautele aemaise o le tauaveina e Lilomaiava Fou Taioalo o ona tiute.
O le Aso Faraile o le vaiaso nei o le a tauaaoina ai e le Kapeneta le lipoti a le komisi ma iloa ai se taunuuga o lenei mataupu.
