Ua toe lima vaiaso o loo totoe ona tatala loa lea o fale palota ae agai le atunuu ua lesitala o ni tagata palota e toe filifili ni sui o itumalo faafaipule i le Palemene ma le Fono usu a le atunuu.
Ua mae‘a nei le saofaiga a sui tauva tamaitai i le latou palemene faataitai poo se mock Parliament sa maua ai lo latou avanoa e tofotofo i tiute o sui faipule pe a tauaofia a le fono usu a Samoa.
O le amanaia e le Fofoga Fetalai o le palemene faataitai a tamaitai na ia tuua ai ona tiute tāua ae afio ane e faatino le faamoemoe o sui tamaitai o loo sauni e tauva i le faigapalota tele a Samoa i le masina o Mati o lenei tausaga.
E lē gata sa amanaia lenei faamoemoe i le faia o le sauniga e tatala aloaia ai, ae na afio foi le fofoga o le fono i lona tulaga o le fofoga fetalai mo le faatautaia o taualumaga o le Palemene faataitai a tina ma tamaitai o Samoa.
O Samoa le isi atunuu o le Pasefika o loo faamauina le pito maualalo tele o le numera o tamaitai e avea ma faipule o le Palemene. O le mafuaaga lea o le naunau o le Malo e faatino teuteuga o le faavae e saofia ai ona faaofi le sefulu pasene o nofoa e tatau ona nofoia e tamaitai o le atunuu.
Na saunoa le Fofoga Fetalai ma ia faailoa o ia le isi sui sa naunau e faatino loa lenei fuafuaga ona o lona manao e siitia le numera o tina ma tamaitai e iai lo latou siufofoga i upufai o le Malo.
I taualumaga o le palemene faataitai a sui tauva tamaitai sa molimauina le aga mālie foi o finagalo o tina ona sa latou toe soalaupule le sefulu pasene o nofoa o le palemene e tatau ona umia e tamaitai. Saunoa se tasi o sui le afioga Lemalu Nele Leilua, sa lē tatau ona sefulu pasene ae sii i le 33 pasene ina ia toatele atu tamaitai e faia tonu o le Malo.
Na faalava le Fofoga Fetalai ma ia faamanatu i sui e lē mafai ona oso atu loa sii i luga le pasene ae malilie ua lava le sefulu pasene ua avatu e le Malo e tau ina amata ai i lenei taimi, ae e mautinoa lava a oo atu i le lumanai o paeaiga a le Palemene o Samoa ua faatoateleina tina ma tamaitai ua umia tofi faipule o itumalo faafaipule o le atunuu.
Sa matauina ua suia le autu o talanoaga a le palemene faataitai i le mataupu lea ua pasia e le palemene aoao, ae ua lē talanoaina e tina le mataupu o faaipoipoga a ituaiga o tagata tutusa poo le same sex marriage, lea na faatulaga e le ofisa o le fono aoao e faia i ai felafolafoaiga.
Na faaalia e se tasi o sui tauva tamaitai o le mea moni lava na mafua ona avatu le autu lea ina ia foliga ai e faalavelave ia latou tapenaga lelei o loo faatino.
O le toatele o sui tauva tamaitai na auai o sui faaolioli o le HRPP. Na faaalia e se molimau e leai ni sui tauva tamaitai mai le vaega faaupufai o le Tautua Samoa i le lio o tapenaga a le Samoa Ala Mai o loo tapenaina sui tamaitai mo le palota tele.
