Ua sauni atu nei le Under 20 a Samoa mo le Ipu ole Lalolagi i Georgia ile faaiuga ole masina nei, faatasi ai ma le latou faiaoga fou ua tofia nei le susuga ia Mahonri Schwalger, lea ua suitulaga ile faiaoga sa iai muamua, le susuga ia Junior Leota.
Ole mae’a ai ole taamilosaga ale Oceania Under 20, lea na taaalo ai Samoa, Ausetalia ma Fiti, na faamavae ai Junior Leota mai le tofiga faiaoga ole ‘au.
O Mahonri sa avea ma faufautua faapitoa mo le Under 20, ile taamilosaga lea ale Oceania.
Ise pepa o faamatalaga mai le Iuni Lakapi na faailoa ai ele Ofisa Sili le susuga ia Faleomavaega Vincent Fepuleai, le agaga faafetai ile faiaoga ua faamavae, le Susuga ia Junior Leota, ona o lana galuega lelei sa fai mo le ‘au ale atunuu. E ui ina e lei faailoa maia e le Iuni Lakapi se mafuaaga ole faamavaega ale alii faiaoga, peitai, e le faaitiitia le agaga faafetai ole Iuni Lakapi i lona sao a’o avea o ia ma faiaoga.
Na faaalia foi le agaga fiafia ole Iuni Lakapi a Samoa ile filifilia ai o Mahonri Schwalger e avea ma faiaoga fou.
Na ta’ua e Faleomavega Vincen Fepuleai, le talia e tagata uma ole filifilia o Mahonri, ona ose alii ua tele lona tamai ile taaloga lakapi, ae oloo ia galue foi ile taimi nei ile atina’eina ole taaloga lakapi, oloo ia faafaileleina ai le tele o tama talavou i lalo ole Samoa Rugby Academy.
Ua galulue faatasi nei Mahonri ma le faiaoga ulu ale Manu Samoa, le afioga ia Namulauulu Alama Ieremia, mo le faamautuina o tapenaga ole ‘au, aemaise ai ole filifiliga o tama ole a fai ma sui ole atunuu. Na ta’ua foi ua mae’a ona faailoa i tama taaalo uma le suiga fou ua iai nei, ma ua folafola foi e tama taaalo lo latou lagolagoina o Mahonri e avea ma faiaoga.
Na saunoa le alii faiaoga ole Manu Samoa, ia Namulauulu Alama Ieremia, o polokalame ale Under 20 a Samoa, ose polokalame aogā tele mo le atinaeina o tama talavou mo le lumanai. Na ia ta’ua foi, ole 2019 le Ipu ole Lalolagi i Iapani, ma oloo faamoemoe tele le Manu Samoa ile taleni a tama talavou oloo taaalo nei ile Under 20.
Na ia ta’ua foi, ole taamilosaga ale Oceania lea na tausinio ai Samoa, ose taamilosaga aogā tele mo tapenaga mo le Ipu ale lalolagi i Georgia.
Na faaalia foi lona agaga fiafia tele ona ole lagolagoina e tama taaalo, ole avea o Mahonri ma faiaoga fou mo le ‘au.
