Ina ua tuumalo le susuga ile faafeagaiga ia Esau Leituala ile masina o Setema ile tausaga nei ise gasegase oso faafuasei, na tauaveina mai ai loa e lona faletua ia Asoono Leituala le tausiaina ole galuega poo le vaaiga ole Ekalesia lenei i Manurewa Agape International Ministry seia oo lava ina fai se faiga filifiliga ale Ekalesia e saili ai se tasi e ono faaauauina le galuega faaleoleo mamoe e pei ona iai lana auauna ua fai i lagi lana folauga.
O lenei filifiliga, sa saili lava i totonu ole lotoifale ale ekalesia lenei, e ala i ana a‘oa‘o ma ana tiakono galulue sa fesoasoani ile faafeagaiga ia Esau Leituala a‘o soifua mai. Ile saili ai ole tofa loloto ma le faautautaga i matafale taitasi ole galuega, o lea sa siilima faatasi uma ai tagata lolotu e filifilia le susuga ile a‘oa‘o ia Tanielu Tuala Tamalelagi ma lona faletua ia Lealofi Tuala e tausiaina le lafu mamoe i Manurewa.
Ole susuga ia Tanielu Tuala ma lona faletua ia Lealofi Tuala, ua faauuina mai ile aoga Tusi Paia ale Agape Bible College i Papatoetoe ile faailoga ole Associate of Theology ile lua tausaga, ona toe faauu mai lea ile faailoga ole Bachelor of Theology ile fā tausaga.
Sa galulue ile ekalesia ole AOG i Papatoetoe ile 17 tausaga, i lalo ole taitaiga ale susuga ile faafeagaiga ia Keki ma le faletua, ona see mai lea ma auauna ma galulue i Manurewa Agape International Ministry i lalo ole taitaiga ale susuga ile faafeagaiga ia Esau Leituala ma le faletua ia Asoono ile lua tausaga seia oo mai lava ile taimi nei.
Ose auauna sa maitauina ele ekalesia le galue malosi ma le faamaoni ile tautuaina ole lotu e ala i ana galuega faatino aemaise o lona tu i tua ole faifeau e lagolago le galuega faaleoleo mamoe seia oo lava ina filifilia e fai ma taitai ole galuega.
Ole taeao ole Aso Sa, 27 o Novema, na pepese fiafia ai ma alalaga faatasi aulotu e ono ole faleono a lenei pulega faapea susuga i faafeagaiga ma o latou faletua, o aiga ma uo, ile hall i Manurewa e siitia faatasi le taulaga ole faafetai ma le viiga ile Atua e patipatia ai le osigafeagaiga ale ekalesia i Manurewa Agape International Ministry ma le latou faifeau fou lenei, le susuga ile faafeagaiga ia Tanielu Tuala ma lona faletua. Ose sauniga mamalu ma le faauuina ile galue ole Agaga Paia ole Atua a‘o vivii lana fanau i totonu ole hall ile taitaiina ole viiga ele susuga ile faafeagaiga ia Atinae Sola, ole taitai foi ole Pulega i Aukilani.
Ole upu faauuina ale Atua na fofogaina lea ele sui taitai aoao ole ekalesia ile lalolagi ia Dr Benjamin William lea na ia faamalosi ai ile leoleo mamoe fou, e faapea e tatau ona e faia le galuega a lē na auina mai a‘u, e lē faia iai sau filifiliga pe fai, e lē fai se‘i e malie, ae ole mea e tatau ona e faia leaga ole galuega na auina mai oe e fai. Ma ole osigafeagaiga ale faifeau ma le ekalesia, e tatau ile faifeau ona fafaga i mamoe ma tausi i mamoe. E lē faalagolago le faifeau ile ekalesia ae faalagolago le ekalesia ile faifeau auā e fafaga ele leoleo mamoe le lafu mamoe.
Ole taitai aoao ole ekalesia Agape International Ministry mai Hawaii ia Dr Ieti Mageo na ia saunia le sauniga ole osigafeagaiga, ma ua tatala uma ai faitotoa ole galuega faafaifeau ile susuga ile faafeagiga ia Tanielu Tuala ma lona faletua ia Lealofi la te taitaiina ai le ekalesia e tusa ma ona taiala.
Ile saunoaga faapitoa ale faafeagaiga ia Tanielu Tuala na ia momoli ai lona loto faafetai ile paia ole aufaigaluega totofi ale Atua ma o latou faletua, o aiga ma uo aemaise ole auvalaaulia ile faamalo‘ulo‘u atu e molimauina lenei faamoemoe. Ma faaauauina ai loa le mafutaga ile taumafataga tele na saunia ele faleono a lenei ekalesia.
Ole tofa ia Faiumu Sili, ole aao tusitusi ale ekalesia sa fai ma fofoga ole aso, ma o ia foi sa tu tootoo i faaaloaloga mo le paia ole aufaigaluega, ma tatala ai loa le fili alii. Ole susuga ia Tanielu Tuala Taimalelagi e mai le afioaga o Safatoa ma Saanapu ae o lona faletua i Lealofi Tuala e mai le alalafaga o Satapuala ma Leone i Tutuila.
