Filifilia Collin Tua‘a – Ofisa Sili taaloga soka i Samoa

O le vaiaso nei ua taunuu ai i Samoa se tasi o alo ma tama fanau a le atunuu sa aumau ma alala i Niu Sila le susuga Collin Tua‘a lea ua faamaonia lona filifilia e avea ma faauluuluga o le taaloga soka i Samoa, i le tofiga o le Ofisa Sili. Faaalia mai e le ofisa o le pulega o le soka, e 12 masina o le konekarate ma e maea tonu i le taimi ua tatau ai ona faamuta le pulega a le komiti faapitoa poo le normalization committee na filifilia e le FIFA na te vaaia galuega a le faalapotopotoga soka a le atunuu, ina ua tuanai ni feeseeseaiga na tauanauina ai le faamavae o le Peresitene ma le Ofisa Sili sa iai o le soka a Samoa.
O le susuga Collin Tua‘a ua 15 tausaga o avea ma faiaoga o au soka a Niu Sila e aofia ai ma le All Whites, ma o lana tautinoga lea o le fia fesoasoani e atiina ae le taaloga i lo tatou atunuu ma silasila i nisi auala e siitia ai le tomai o alo ma fanau a Samoa i lea taaloga. Faaalia e le taitaifono le tumau o le komiti faapitoa o loo vaaia le atinae o le soka a le atunuu le susuga, Toetu Petana, o le filifilia o Tua‘a o se faaiuga na faia ma le totoa ona ua mautinoa ua faaauupegaina lea tama fanau a le atunuu i tomai e mafai ai ona ia toe auli faamafolafola faaletonu sa tutupu ma aliali mai i le tele o tausaga ua mavae.