Ua faaopoopo atu se isi faamasino fou i galuega a le Faamasinoga Faaitumalo poo le District Court a Samoa, ina ua tofia le alii loia sinia le susuga Leiataualesa Daryl Clarke e seei i lea tofiga.
O ia o se tasi o loia sa galue i le ofisa o le Loia Sili a le Malo mo ni tausaga, seia oo ina faamavae ma agai atu e galue i se ofisa loia tumaoti lea e tofia nei o loo faagaioia sana lava ofisa loia.
O le Aso Faraile ua mavae 29 o Ianuari 2016 na faatauto ai le alii faamasino fou i luma o lana afioga i le Faamasino Sili, Patu Tiavaasue Falefatu Sapolu.
O se sauniga sa faatumulia i aiga ma uo aemaise o taitai o le Malo le afioga i le Palemia, ma Minisita o le Kapeneta faapea faauluuluga o nisi o matagaluega a le Malo ma pisinisi tumaoti. O le sosaiete foi a loia i Samoa sa auai lo latou peresetene faapea le loaloa o le aufaigaluega a le Matagaluega o Faamasinoga ma mataupu tau faamasinoga.
O le saunoaga a le Faamasino Sili na ia faaalia ai o le alii faamasino ua filifilia o se tasi ua loa tausaga o galue o se loia. O se loia foi ua aofia uma le lio o galuega tau faamasinoga ua auai e pei o faamasinoga tau soligatulafono mamafa, o faamasinoga tau i mataupu sivili, ma faamasinoga ua tagofia ai mataupu tau tulafono faavae. O lona uiga e pei ona saunoa le Faamasino Sili o se tasi ua lava lona silafia i galuega tau tulafono i totonu o le faamasinoga.
O lea ua faaopoopo atu le susuga Leiataualesa i galuega a le Faamasinoga Faaitumalo, ina ua see mai se tasi o faamasino tamaitai le afioga Mata Tuatagaloa e avea ma faamasino o le Faamasinoga Maualuga.
O le a galue faatasi nei le alii faamasino ma isi faamasino sinia o le faamasinoga faaitumalo e pei o le afioga Vaepule Vaemoa Vaai, Galumalemana Ameperosa Roma, ma Leilani Tuala Warren.
Na saunoa le alii faamasino fou ma ia faaalia lona agaga faafetai i le pulega o galuega o galuega a le faamasinoga i le iai o so latou faatuatuaga maualuga i lona tagata e na te tauave ai galuega tau faamasinoga.
O lana faafetai foi i ona aiga i le lagolago mo ia i le tele o tausaga o galue faaloia seia oo ina tuu atu lo latou faatuatuaga ma le talitonuga o le a ia tautua ma le faamaoni i le tofiga faamasino ua tofia ma filifilia i ai.
Mo le silfia o le susuga Leiataualesa Daryl Clarke, o lona tuaa poo lona tamā o se tasi o loia sa galue i le faamasinoga i tausaga e tele ua mavae lea sa faaigoa lava e tagata o Kalaka (Clarke).
Na maliu o ia i se faalavelave tau taavale a o talavou lona soifua, ae tuua ai na o lona toalua o se tamaitai Samoa i le aiga o le au Keil. O le tupuaga lea o le alii faamasino i le itu o le aiga o lona tina.
Ia manuia tele le tulai mai o lenei alo o le atunuu i le tofiga faamasino o le faamasinoga a le atunuu.
