Sa faatumulia ai Totara Park i Manurewa ona o le fiafia faaiu a le Kolisi a teine o McAuley, Otahuhu i le Aso Toonai na tea nei. O lenei faamoemoe na faafetaia ai le paia o mātua, faiaoga, o ē na nafa ma le a‘oina o pese ma faafiafiaga, aemaise lava o le fanau sa tauva i siva faasamoa i le Polyfest 2014. Na latou mauaina i tauvaga a aoga a teine faailoga:
1st Mauluulu
1st Sāsā (Ta‘ita‘i – Monika Misipati)
1st Taupou (Danielle Bureta)
1st Togiga
1st Taualuga
2nd Fuataimi (Joyce Tolovae)
2nd Pese o le Aso
3rd Ulufale
2nd Tuufaatasiga
E maoa‘e tulaga na ausia e le laumua ona o le taleni faasoa mai a ē na a‘oina fiafia, ma sa fai meaalofa ai le ausiva ia Vanessa Vetelina, Jenny Huch, Latoya Huch, Linda Taula, Neil Tapu ma Iakopo Iakopo mo le latou fesoasoani tele. Na amata le faamoemoe i le lotu, sosoo ai ma taaloga a le fanau, taumafataga o le aoauli, ae faaiu i fiafia. O le mau a ta‘ita‘i ma faiaoga, ‘E lē maua uma e fanau ia avanoa. O le tāua o le Polyfest o le a‘oa‘oina ai lea e fanau o loo soifua i Aukilani le gagana ma le aganuu o pese ma siva faasamoa.
E tautala mai le pese ma le siva i le feau o le aso. A gaioi foi le tausala ma le manaia i saasaaga faasamoa, o taaga e iai o latou uiga. O upu o pese e loloto, auā e ta‘u mai ai lo tatou faasinomaga, e tasi i tatou ma le siosiomaga, o mea uma na faia e le Atua i le foafoaga, ia faapelepele i ai. E tāua foi le taupati mai o mātua e lagolago le faamoemoe, auā e auau ia latou fanau. Ae amata ma faaiu mea uma i le Atua. O le ala lea o le auai mai.’ O ta‘ita‘i na faafoeina le laumua o Fetuna Cardona, Laavasa Toleafoa, Fiti Pritchard, Carolnino Ah Hing, ma Tiana Efaraimo.
