O le faiga filifiliga a le atunuu e ala i lana faigapalota i nisi o tausaga ua mavae na tauva ai le tamaitai loia ia Maiava Visetoka Peteru i le nofoa o Aana Alofi Numera 3 i lona suafa matai o Maiava i le itu o lona tamā i Faleasiu.
Ae o lea ua toe tapena atu mo le faiga filifiliga a le atunuu ia Mati i le itumalo o Alataua i Sisifo i lona suafa matai o Taatitimanaia i le itu o lona tina i Neiafu ma le Aiolupotea i Falelima.
O se tasi lea o sui tauva o lea itumalo o loo taulai uma i ai le matematega a le toatele e iu na pale mai i le nofoa o Alataua i Sisifo auā se leo o le itumalo i totonu o upufai a le atunuu i le Palemene o Samoa.
I se lagona na a‘e i le afioga ia Taatitimanaia Aiolupotea ua tatau ona fai sona sao poo sana tautua i le itu lea o lona tina poo le itumalo o Alataua i Sisifo, ae lē gata i lea, ua ia talitonu o lea itumalo e lē gata ina tāua i talafaasolopito a le atunuu, ae o loo silasila foi o loo tele atinae o loo manaomia.
Auā e pei o Alataua i Sisifo o le faitotoa lea o le itu Asau, o loo iai matafaga aulelei ma manaia ae leai ma se atinae tele o mafai ona fai ai, e pei o ni Beach fale ma faletalimalo. Ma o se vaega tāua mo le mauaina o galuega a tupulaga i lea faaitu o le motu tele, e faigaluega ai tupulaga talavou, e ese mai ai i tulaga masani i le atinaeina o maumaga.
O le talitonuga o Taatitimanaia, o le avea ai o ia ma faipule, e lē gata o le a avea ai o ia ma Leo o le itumalo, ae pei o se faitotoa foi o ni avanoa, e na te sailia ai avanoa o ni atinae mo tupulaga ma le itupa o tina. E lē o iai se falekomiti i le latou nuu o Neiafu, o le faleaoga i Falelima ua leva ona taumafai e faaleleia.
O lana anavatau o lona taumafai e vaai i le lumanai o lona itumalo, ma ni tulaga e mafai ona galue malosi ai e faaleleia ai nisi itu e pei ona muai ta‘ua.
O loo silasila foi Taatitimanaia Aiolupotea i le taumafai e faaleleia le ola atu a le TV i totonu o lona itumalo auā o se tasi lea vaega tāua tele, faatasi ai ma le kilia lelei o fesootaiga i tulaga o telefoni feaveai (mobile phones) auā e fiu e vili se aiga i totonu o Falelima e seāseā maua.
O lona uiga ua leva ona fia maua e lea itumalo se fesoasoani, o lea ua 2016 a o lea lava e lei ola se TV, na o le tutū o TV ma faaaogā i video ae lē o mafai ona ola ai ni ala ata auā le maimoa i mea o loo tutupu i totonu o le atunuu, o polokalame a le malo ma le tele o faalauiloa o loo fai i le suia o le tulafono, auā o lea ua sā ona faaaogā se tupe i faigapalota, ua tele ina lē o maua e lea itumalo, ae faapea foi ma leitio, e mo‘i e maua i nisi o taimi a o isi taimi e lē ola.
Ma e matuā tele tele le tulaga o loo misi ai le mauaina o fesootaiga a le malo o loo faatino. O lenei foi vaitau ma le vevesi i le tele o faalauiloa o loo faaalu i le faigapalota, e tele ina lē o maua e lea itumalo, se‘i vaganā ua omai i Apia pe oese mai le itumalo o Alataua i Sisifo faatoa maua ai lea o nei fesootaiga, e oo foi i mobile e matuā leaga lava.
O se tasi o anavatau a Taatitimanaia Aiolupotea o le finau lea e faaleleia le tulaga o tina ma tamaitai, ina ia siitia ma maua e tamaitai le tulaga tutusa, ina ia ola a‘e le teine ma le tama Alataua i Sisifo e iloa lelei e tutusa lona avanoa e aoaoina ai, tutusa le avanoa e tausinio ai i soo se galuega, e oo lava i le tofiga o le faipule.
Ae ia uma ai le tulaga e faapea, e aoaoina le teine ae lē ausia ona avea ma se faipule. E telē lona naunau ia foia le tulaga o le lē faigaluega, ae lē gata i lena o ni polokalame e maua ai seleni mo atinae ma pisinisi laiti mo tina ma tamaitai. O galuega taulima a tina e pei o le lalagaina o fala, ia lelei ma manaia ni mamanu ma lanu e faatau atu e maua ai tupe mo tina, tainane le itumalo atoa.
O loo faamalosia le tulaga i komiti, o loo mautu lelei le komiti a tina i faletua ma tausi faapea i sa‘oao i totonu o alalafaga nei, ae o le tulaga o le lē maua o ni auala e siitia ai le tulaga nei, e pei o le faia o elei e maua ai le tupe a le tina latou i totonu o le itumalo e aunoa ma le tau sau i fafo. Mo le tupulaga talavou e vaai poo ā ni atinae e mafai ona fai i totonu o le itumalo e galulue ai, auā o le tele o tupulaga, e ala ona nonofo i totonu o nuu ona o loo tausi latou aiga ma mātua.
Ia taumafai la e fai ni atinae i totonu i fanua, o polokeki faapenei e tatau ona faatino, auā o loo tele lava funding a faalapotopotoga mai Malo Aufaatasi e faatino ai. Ae o le leai lava o se tasi e tatala mai ai faitotoa nei.
O le matagaluega o fesootaiga o loo iai le talitonuga o Taatitimanaia Aiolupotea Maiava Visetoka Peteru e tatau ona ave i ai le faamuamua mo Alataua i Sisifo.
Sa fesiligia i sona finagalo i le tulafono o loo agiga e ono tau faaofi i le faaaupegaina o malu o le malo o Samoa. Na saunoa le faipule faaolioli e faaeteete tele o ia i lea vaega ona o loo iai foi laau malosi i nisi o i latou o lo faia le maruana, ma e augata tele lona taofi e lagolago lea polokalame i lenei taimi i totonu o Samoa, auā o lona talitonuga e lei oo i se taimi e faapea o le a tofu ai alii ma tamaitai leoleo poo malu o le malo ma auupega.
I le toatele ai o faipule tamaitai o lo tauva i itumalo eseese, ua faamoemoe ai le sui o Alataua i Sisifo, o le tauvaga o le a faia nei, e manatu maualuga o le a maua se fuainumera lima pe sili atu, ona lē manaomia lea o le tulafono fou lea na fai.
E faavae lona talitonuga i luga o le tulaga, o lea e tusa ma le 20 tamaitai o loo ta‘uta‘u i le taimi nei o le a avea ma sui tauva, peitai faatoa iloa suafa pe a mae‘a ona tapunia i le aso 12 o Fepuari le resitalaina.
Afai ae toatele ni faipule tamaitai o le a manuia i nofoa o le Palemene, o lona lagona e lē na o ni mataupu tau i tamaitai o le a talanoaina ai, ae o le a aumaia ai ni vaaiga fou ma ni suiga fou, manatu fou auā o ia o le tina, e tusa lava poo le ā le mataupu, e talitonu e iai le tomai a le tina e avatu ai ni manatu, auā e ese lava le vaai a le tamā e ese foi le vaai a le tina.
I le tuufaatasia la o manatu nei o alii ma tamaitai i totonu o le Palemene e manatu Taatitimanaia o le a maua ai se Samoa malosi ma faaaupegaina ai le malo mo le manuia o le atunuu.
Ua iai foi suesuega ua mae‘a ona faia ma faamaonia ai soo se Palemene a le lalolagi e tau foliga e tutusa ai le aofai o alii ma tamaitai faipule i totonu o le Palemene, o malo manuia na. O le taimi nei ua tatau foi ona tulai mai le itupa o tina auā ua leva ona latou tapuaia faiva o le atunuu, ma o latou foi o le pae ma le auli, ma e manaomia tele lea tomai i totonu o le Palemene.
O le taeao o le Aso Toonai 30 o Ianuari na faataunuuina ai le faamoemoe o le sailiga seleni a le afioga ia Taatitimanaia Aiolupotea i le hall a le Kalapu Lakapi a Aukilani i Otahuhu, ma sa tumutumu ai aiga uo ma ē masani aemaise o sui o le itumalo e lagolago le faamoemoe a lea sui tauva.
O le susuga i le faafeagaiga ia Matafala Lesa mai le Ekalesia o le AOG i Mount Wellington na taitaia le polokalame i le sauniga, ae o le susuga ia Talatoa Mafutaga sa fai ma fofoga o le aso.
O le toatele o le mamalu o le atunuu sa lē mafai ona autovaa atu ona o le pisi i tiute ma galuega ae sa faaoo atu lava lo latou maau mo le faamoemoe a le sui tauva. E lua itula na faatinoina ai lea polokalame ae sa iloga le tali mai o le atunuu ma le itumalo, ma o se lagona na faateia ai Taatitimanaia Aiolupotea ma le aiga i le puupuu o le taimi ae sa vaaia se tupe tele lea e $29,000 na maua ai.
O le agaga faafetai a le sui tauva na momoli ai lona agaga fiafia tele i le paia o Samoa potopoto aemaise o laua aiga na faatasi atu e molimauina ma lagolago i lona faamoemoe. Ma o le viiga sili lea mo le Atua.
