Ua faafagogo tagiao i le faafofoga a le atunuu pe a oo ina faatino se palota tele e filifilia ai tofi faipule o le Palemene, saunoaga ma feupuaiga i le va o faipule ma sui lagolago i se faigamalo ma se vaega faaupufai o agaia se Malo mataupu e sueni ai i luga ni faaletonu ma ni vaivaiga o loo aafia ai se taumafaiga a se itu faaupufai.
O le tulaga lea o loo molimauina nei i tapenaga a le atunuu aemaise o vaega faaupufai o le HRPP ma le Tautua Samoa. O le amataga o lenei tausaga fou na folasia ai e le Tautua Samoa nisi o ana faiga faavae o le a latou faatino pe a avea ma faigamalo fou.
O loo faaauau pea ona fofola mai ana faiga faavae ae e lē o nofonofo ai le Palemia ma le taitai o le HRPP i lona feulaina i ni saunoaga malolosi ma faalumaluma o fuafuaga a le Tautua Samoa.
O le vaiaso na tea nei na faailoa ai e le Itu Agai o le a latou sii le totogi maualalo poo le minimum wage mai le $2.30 sene i le itula o loo iai nei, i le $3 tala. Saunoa le taitai le afioga Palusalue Faapo II, ua leva ona tatau ona sii i le $5 tala i le itula le totogi pito maualalo, ma a fua i le totogi o loo iai nei o loo nofo aitalafu le Malo i le au faigaluega togi aso i le $1.70 sene.
Peitai o lana saunoaga na ia faaalia ai e tele mafuaaga e lē mafai ai ona tuu tonu le totogi pito maualalo i le lima tala ona e fai fuafua foi i le aufaipisinisi tumaoti ma a latou tupe maua. O le mafuaaga foi lea o le a faia ai e le Tautua Samoa se siitaga e lē gafatia e le aufaipisinisi poo le private sector, ae o le a sii le totogi pito maualalo i le faaopoopo o le 70 sene.
O le agai atu o le Tautua Samoa e faatino ana fuafuaga pe afai e manumalo i le faigapalota o le a silasila ai i vaega o loo alu maumau ai tupe a le atunuu ina ia taofia ma faaitiitia, ae alu uma seleni e faatupe ai a latou fuafuaga e pei o le aveese o komiti o iai nei a matagaluega eseese a le Malo. O komiti nei o loo iai i totonu sui o nuu ma itumalo ma na faaalia e Palusalue o ni seleni maumau o loo alu ai i o latou totogi ae leai ni galuega o loo latou faia.
Peitai o se tasi lea o fuafuaga a le Tautua Samoa ua faamatalaina e le Palemia o se fuafuaga ua lē fetaui ona o komiti nei o loo fautuaina le Kapeneta i le faatinoga o atinae ma galuega a le Malo.
Na ia faatepa ai le vasega o tusitala i se tasi o fono faavaomalo sa auai, lea na ia molimauina ai o nisi o toe ulutaia o le atunuu o Iapani o tagata ua oo i le 90 tausaga le soifua o loo ave i ai le faatuatuaga o taitai o lea Malo latou te faataoto fuafuaga e lima taitaiina ai lea Malo i ana galuega.
O komiti o loo iai a le Malo o Samoa o loo faamatalaina e nisi faipule o ni komiti ua fausia ina ia ave i ai matai matutua o nuu ma itumalo o loo lagolagoina malosi le HRPP, ma o le taui lea o le latou lagolago o le ave i ai o totogi ae agai e vaai ma siaki mai galuega a Matagaluega eseese ona lipoti lea i Minisita o matagaluega mo le tuuina atu i luma o le kapeneta.
O le taimi o avea le afioga Tofilau Eti Alesana ma palemia na amata fausia ai ia komiti lea o loo faaauauina pea i le taitaiga a Tuilaepa ma le HRPP.
