Ua lē misi se tausaga ma faatino lenei galuega fesoasoani a le Faalapotopotoga o le Aiga Vatikano i totonu o si o tatou atunuu i Samoa. O le tausaga ua mavae sa faia ai foi se fesoasoani mo le nofoaga i Mapuifagalele.
A o lenei tauasaga ua tuu atu lo latou tau‘au e galulue ai ma tamaitai Taupousa i Lepea faatasi ai ma Safotu, ona o nisi o vaega e fia faaleleia i maota ma nofoaga o loo galulue ai nei alo o le atunuu ua ofoina o latou soifua mo le galuega a le Atua.
O lenei faalapotopotoga o loo faatamā ai Patele Michael Enderman ae peresetene ai le susuga ia Taa Sio Lotam faatasi ai ma nisi o tamalii ma faletua ua mafai ona galulue felagolagomai i totonu o lenei sosaiete.
O le afiafi o le Aso Toonai, aso 11 o Oketopa na faataunuuina ai se taumafataga (Dinner) poo se sailiga tupe i le hall a le Ekalesia Katoliko i Onehunga, mo lenei faamoemoe i Samoa. E 47 laulau sa fuafuaina e le Vatikano mo lea po, ae peitai e latalata i le 500 tagata sa auai ona o le fia fesoasoani lava i le galuega atiae a taupousa.
E lua sui o tamaitai taupousa mai i Samoa na malaga mai i lenei sailiga tupe, faapea foi le pule o le kamupani vaa o Samoa le afioga ia Papalii Willie Nansen. O nisi o faalapotoptoga ma auaiga o tamaitai taupousa, o afioga i Patele ma sui o ekalesia o matagaluega Katoliko taitasi i totonu o Niu Sila sa faapea ona auai uma i lea faatasiga.
O le faatamā ia Michael Enderman na saunia le tatalo e amata ai le polokalame, ona saunoa lea o le fofoga o le po le faletua ia Ima Taa e faafeiloai le mamalu o Samoa potopoto, ma faagasolo ai loa ma le autu o le taumafataga.
O le faili a le susuga ia Tenari Tautua sa faafiafiaina le mamalu o le atunuu faatasi ai ma tamaiti o le Nato Brothers mai le afioaga o Safotu.
O le tele o Ekalesia Katoliko ma faalapotopotoga eseese aemaise o nisi o kamupani sa auai, sa faapea lea ona fai a latou siva, ae lē gata i lea o auaiga o tamaitai Taupousa sa latou lē tuumamaina foi le afiafi i le fia togi o se maa auā lava le faamoemoe.
E faagasolo faafiafiaga ae tatala ai foi ma le taumafataga na saunia lava e le Vatikano. O nisi o kamupani sa latou lagolago ma foai atu vai taumafa faapea le ekalesia Katoliko i Onehunga na latou ofofina le totogiina o le hall.
O se po lagilelei ma vaaia le fiafia o tagata e foai. O le agaga faagaeetia o Taupousa na malaga mai i Samoa, na saunoa ai se tasi o sui o lea aumalaga e fai se molimau e uiga i galuega ma mea o loo tutupu i totonu o le nofoaga i Lepea ma Safotu aemaise o aoga o loo galulue ai, sa faaleo foi lo laua agaga faafetai i le mamalu o le atunuu i le auai atu e opogi le faamoemoe.
O faafiafiaga na taualuga i le sausaunoaga a le faatamā o le Faalapotopotoga o le Vatikano ia Michael Enderman, ma saunoa ai loa ma le peresetene le afioga ia Taa e momoli le faafetai tele ia Samoa potopoto e tusa ai ma le lagolago i se faatalauula atu mo se fesoasoani i le faaleleia o maota o taupousa i Samoa, ma o le afiafi lava lea sa tauaao atu ai loa ma le seleni na maua i lima o tamaitai Taupousa auā lava le latou galuega.
