I le amataina o le taamilosaga o le Ipu o le Lalolagi o le Lakapi i lenei tausaga, o loo tuufesili pea le Lalolagi poo ai e ono manumalo i lenei tausaga. O loo tumau pea manatunatuga o nisi o Au matutua i le taamilosaga e lē tau fesiligia lena tulaga, ae ina ua mae‘a uma mai taaloga o loo faapolokalameina mo le vaiaso muamua, masalo o iina lea ua toe suia ai lagona o nisi o atunuu faapea foi tapuaiga ona o Au sa lē mafaufauina e tulai mai i se tulaga lelei, ae o lea ua matuai silamaimoa le lalolagi e lē o toe tutusa aso, mafai foi ona faapea o le fetii o fesuiaiga o lenei meleniuma i le lakapi a le lalolagi.
O se vaaiga atonu e mafai ona faapea le malosi lea o le tupe ua fesiitai ai Faiaoga o le taaloga mai lea atunuu i lea atunuu ona o le naunau lava ia ausia le tumutumuga o le taaloga i le Ipu autu.
Atonu o le tali foi lea i le pulega o le Lakapi o le Lalolagi i tulafono ma faasinoala o loo ia pulea ma lima mamau i ai ua lē agavaa ai nisi o alii taaalo i o latou atunuu e taaalo ai. O se vaaiga i lona uluai vaiaso o taaloga ua faaupuina ua leai tele se faaoso fia matamata i le faasoloina mai o taaloga, ua pei ua ese mai nai lo le tele o tausaga o le taamilosaga, e sagisagi fiafia tagata uma e talia, e faasoaai i taimi uma i le tele o taaloga.
Ae ua pei lava ua na o se taamilosaga ua sola le lelei na sio taamilo ai, o atunuu sa tau faafailele i ai le taaloga ua vaaia le fua mai o seleni i konekarate tetele i le faatauina i ai o Faiaoga lelei, ma alii taaalo lelei ua tosina i le malosi o le tupe, o se faamanuiaga lelei tele lea mo le lumanai tau atiae o aiga i nei ona po.
Le isi lea vaaiga i lenei taamilosaga ua tele ina faiaoga mai e faiaoga mai isi atunuu Au a atunuu o loo tutumu i tagata ma faiaoga atonu e sili atu foi lo latou tomai ma le silafia i auala ma metotia i fai ai le taaloga.
Uma lelei taaloga o le uluai vaiaso, ua lē vaaia le lakapi tosina gofie i ai le fia matamata, ua matele i le malolo i sala ma isi tulafono ua taofia ai le fia maimoaina o se taaloga.
O le faatoilaloina o nisi o Au iloga poo Au tetele o le taamilosaga, o se lagona lelei lea i le ulufale mai ai o nisi o atunuu o loo finau lava i lo latou lava tomai ma finafinau pea. O le taaloga a Iapani ma Aferika o se faataitaiga mautinoa lea o le “taalo mai le fatu”, poo le faatauvaa i le vaai.
Ae ua sa‘o le agana e masani ai le tpulaga “e laitiiti ae maini”. Talosia taumafaiga a atunuu ma malo tauatiae ina ia manuia, auā ua selesele nei atunuu tetele i manuia o le taaloga ae tau saili fesoasoani pea nisi malo ma atunuu i faamanuiaga seleni o loo solo atu pea i na malo. Talosia taualumaga uma o lenei taamilosaga ina ia faaiuina ma le manuia….” GO DA MANU”!!!
