E ui ina mavae atu lea augatupulaga ma lea augatupulaga, aemaise ai foi le motu mai o le taula e ala i le soifua o nai o tatou tagata i atunuu mamao, ae lē mafai lava ona galo le fatu na toto e o tatou tuaa, e ala i le soifua faaleagaga ma le taitaiina o ola o le fanau i le finagalo o le Atua.
O le Lotu a Tamaiti poo le Aso Sa Paepae o le fanau, o se tasi lea uluai faleaoga o le soifua ma le ola faaleagaga o soo se tama ma se teine Samoa, a o soifua ane i totonu o si o tatou atunuu.
E iai le talitonuga o le toatele o i latou ua faamanuiaina ma avea ma auauna a le Atua, faatasi ai ma soo se faiva ua galulue ai tamafanau a Samoa i soo se taleni faapea le galuega a le Atua, sa poupou lava ma amata mai i le faatinoina o le Lotu a Tamaiti i tausaga ua mavae.
E pei lava ona faamanatuina i le tele o Ekalesia eseese i lenei foi setete o Kuiniselani le felanulanuai o teuga a nai fanau, ae sili ai le feau tāua na o latou faasoa mai a o faafofoga mātua ma ekalesia taitasi i le Aso Sa na tea nei 12 o Oketopa.
Na molimauina ai foi e mātua ma aiga i totonu o le Ekalesia a le Assembly of God a Kingston i Brisbane, le avea o fanau ma agelu o le pulelaa e auala mai ai le finagalo o lo tatou Atua. O le sauniga na taitaia lava e le Taitai o le Aoga Aso Sa, le susuga ia Faga Mafo‘e, a o le laugaina o le Upu a le Atua, o le susuga i le Faafeagaiga ia Ps Manuula Nai. O le Autu o le feau mo tamaiti, “Ia faalogo ma usitai i mātua, o iina o loo iai manuia o le Atua.”
O le taitai o le Aoga Aso Sa, o le susuga ia Faga Mafo‘e ma le faletua ia Eseta, ae o le Failautusi/teutupe, o le susuga ia Iosefa Collins ma le faletua ia Titi.
E le mafai foi ona galo le galuega fita sa feagai ma faiaoga taitasi, faapea le lagolagosua a le susuga i le Faafeagaiga ia Ps Manuula Nai ma le faletua ia Foloi, aemaise le tapuaiga a mātua.
Na iu mea uma i lea aso i le viiga ma le faaneetaga i le Atua silisiliese, auā o ia lava le mafuaaga o nei mea uma.
