Ole faletalimalo ole Waipuna Hotel i Mt. Wellington na faataunuuina ai ile Aso Lua na tea nei, 28 o Mati le feiloaiga a taitai ole Pasefika, Pacific Leadership Forum (PLF) ma le minisita fou o tagata Pasefika i Niu Sila (Minister of Pacific Peoples) Hon. Alfred Ngaro.

Ose sauniga na aofia ai taitai mai atunuu eseese ole Pasefika i totonu o Niu Sila oloo i lalo ole faamalu ole Pacific Leadership Forum.

Ole sauniga lotu na tatala ai le faamoemoe, na feagai ma le aufono a Tonga, lea na taitai e le susuga ile faafegaiga taitai (Faifekau Pule)  ole Free Wesleyan Church Rev. Lopini Filise…

Ole saunoaga e faafeiloai ai le Minisita sa feagai ma le aufono ale Atu Kuki (Cook Islands) na avea ai Dr. Joe Williams lea sa avea ma Palemia ole Atu Kuki e fai ma sui ole PLF…..

Ole ava ole feiloaiga sa gafa ma le au fono a Samoa, lea gafa faleupolu ia Sooalo Setu Mua, Savea Al Harrngton Lavea, ma le tofa ia Matamua Lapa Leatioo… Ona alo ai lea i mataupu ole fonotaga sa taitaia ele taitaifono ole Pacific Leadership Forum (PLF) le Tofa ia Teleiai Pau Suatapuloloo Edwin Puni.

Ole Pacific Leadership Forum (PLF) ose tuufaatasiga o Ekalesia, Faalapotopotoga ma Taitai taualoa ole Pasefika i Niu Sila lea ua savali nei ile lua tausaga talu ona faavae. Ole faamoemoe autu ole Pacific Leadership Forum ina ia iai se leo aloaia o tagata Pasefika e fesootai ai i faigamalo a Niu Sila, faapea pulega faaitumalo ma auaunaga tetele i mataupu e atinaeina ai o tatou tagata ua alala ma papaaao i Aotearoa.

Ole taimi nei oloo ia Samoa le tofi taitaifono ile tootoo ole Tumua (Leulumoega), le fetalaiga ia Teleiai Edwin Puni.

Ole masina o Aperila ile tausaga ua tuanai na valaaulia ai e le palemia talu ai o Nu Sila (John Key) se feiloaiga ma le Pacific Leadership Forum na faataunuuina ile maota fono ole palemene (Beehive) i Ueligitone ina ia faafofoga ai le palemia ma le faigamalo a Niu Sila ile Mau ale PLF mo le atinaeina o tagata Pasefika i Niu Sila.

O lea feiloaiga na masii atu ai sui e 50 ole PLF ua faamauina nei ile tala faasolopito o faiga Malo a Niu Sila ona faatoa iai lea ose Mau a tagata Pasefika ua faatalanoaina ma le Palemia ma le Sui Palemia i totonu ole Beehive.

Ole maea ai o lea feiloaiga i na i vaiaso mulimuli ane na faailoa mai ai i se tusi aloaia mai le Malo e auala mai le Minisita o Tagata Pasefika (MPP) i lena taimi, Afioga Peseta Sam Lotu-Iiga le aloaia e le Malo ole Pacific Leadership Forum (PLF) ma le Mau ale PLF sa tau aaoina e le Palemia ile feiloaiga ile Beehive.

Ole feiloaiga la ile vaiaso talu ai na faailoa ai e le Minisita ua iai nei o Tagata Pasefika ile fonotaga ma le PLF ia taualumaga o nisi o mataupu ole Mau ale Pasefika e aofia ai le talosaga ina ia faatuina se Pacific Cultural Centre.

Ile taimi nei ua ia ile kapeneta le suesuega ua maea (feasibility study), mo se finagalo ole kapeneta  ile faagaioi ina o lea tulaga.

O lea mataupu ale Pacific Leadership Forum aua le agai iai ole toatele o alo ma fanau ale Pasefika ua na ole maea ole Polyfest i tausaga taitasi ma uma atu ai lava. O lea atiinae ole a faatupu ina ai avanoa faigaluega mo le toatele o tagata Pasefika talenia i taleni eseese ae leai se nofoaga faapitoa mo le faalauiloaina o nei taleni ma nei mau tomai mo tagata tafafao maimoa mai i Niu Sila.

Ole maea ai ole feiloaiga na faailoa ai e le taitaifono Teleiai Edwin Puni ile alii Minisita, ole masina o Aperila poo le amataga o Me e fia feiloai ai le Pacific Leadership Forum ma le alii Palemia Hon. Bill English.

O lea feiloaiga atofa ua ioeina ele Palemia o Niu Sila ma ua taatia ai nei ose taimi e le toe mamao ona feiloai loa lea ma  taitai ole Pasefika i Niu Sila nei.

Se taimi e le o mamao ona faasopolia uma lea o itumalo o Niu Sila ile fono lenei i ni o latou sui.

Comments

comments