O loo i Samoa se ulugali o le la galuega o le lapatai ma fautua i tagata o le Pasefika e aua ne‘i faaaogāina taumafa o loo faaaogā ai vailaau.
O se taumafaiga ua tele tausaga o lagalaga lava ona o le popolega i aafiaga o le atunuu ma tagata o le Pasefika mai i taumafa ua faaaogā ai vailaau.
O se faiga e lē faigofie auā o le tele o taumafaiga i atunuu i fafo ua faapea foi ona sosolo mai i Samoa ma isi atumotu o le Pasefika, sa mafua ona faaaogā i ai vailaau ona o le itu lea e tele ina faama‘ia o tatou eleele ma laufanua, ma o le faaaogā o vailaau ia na mafai ai ona tape faama‘i ma manu faalafua sa lē ola lelei ai foi togalaau ma maumaga aemaise isi faatoaga i le atunuu.
O lea ua amata lava ona tapu le faaaogāina o vailaau fanavao. O lea ua unai le aveese o fetalaisa poo faalelei eleele ma ua aveese foi le tele o oloa o loo faaaogāina vailaau mo le vave ai ona maua aano o manufasi e pei o vaemoa lapopoa ua faatau atu i le atunuu.
O le toatele ua toe fautuaina ina ia mafai ona faaaogā moa Samoa auā e leai lava ni vailaau o faaaogāina ai. Ua tele lava foi ina faamalosia le taumafa ma le faatau o fua o faaeleeleaga o loo toto sa‘o lava ma e lē o faaaogāina ai ni vailaau e puipuia ai.
O lea la ua unaia lenei feau tāua e le ulugalii lenei mai i Niu Kaletonia, ma ua faalauiloa ai le tāua o le taofi o le faatau o oloa o loo ta‘ua e maua mai ona o auala faasaienisi poo le GMO (Genetically Modified Organism).
O le ulugalii lenei o ni sui o se faalapotopotoga faapea i totonu o Niu Kaletonia. O le laua lava lea galuega ona o le la mau, e toatele tagata o le Pasefika e na o le faatau lava o oloa nei mai fafo, o loo ua faaaogā ai suiga nei e aunoa ma le iloa o aafiaga o le soifua mai le taumafaina o nei taumafa.
O moa e pei ona ta‘ua e tatui ina ia vave ai ona tutupu pe tusa ma le ta‘i vaiaso ona aogā loa lea mo le taumafa, ma o Samoa le isi atunuu e matuā taulia ai lava vaemoa nei.
O lea e taugofie atu le vaemoa nai i lo le eleni i le taimi lenei ma e faigata tele ona tauva oloa nei o loo faapea mai e maua i auala faalenatura auā e taugata atu, ae o oloa nei e tuu ai vailaau e taugofie ma e lapopoa, e lava ai aiga toatele e pei o aiga o Samoa.
Faaalia e le taitaifono o le faalapotopotoga lenei e ta‘ua o le Taofi o le GMO i le Pasefika, Frederic Guerin ma Claire Chauvet o le failautusi, e tāua le faamanatu ia Samoa o le aafiaga o nei ituaiga oloa, ma o se auala ina ia mafai ai ona tausi le soifua maloloina o tagata o lea itulagi.
