O se faamavaega ma loimata na oo i ai le mafutaga a tina matutua o le Te Motu Way i le taeao o le Aso Faraile ina ua faamae‘a le latou polokalame o lenei tausaga. E ui e lei auai uma tina o lenei faalapotopotoga ona o tuatuagia i tiute ma galuega ae sa faigata ona toe faamotusia le mafutaga ona ua mafanafana ma ua avea foi nei tina o se aiga e tasi.
O le faaiuina ai o le latou faamoemoe i lenei tausaga, na faia ai a latou asiasiga e ala i meataulima sa latou faatinoina, e pei o taga aluga, o ula, sei fulumoa ma titi fulumoa. E asiasi lava le tina latou i ana galuega sa faatinoina, ma o nei galuega taulima uma e faatino lava i nisi o Aso Faraile o loo mafuta ai, faatasi ai ma taaloga bingo ma le pelē e fiafia ai, a o nisi Aso Faraile o pesepesega ma faigasiva.
O le masani a lenei mafutaga i soo se aso lava e feiloai ai e muamua ona fai le latou taulaga faafetai i le Atua ma e faasolosolo i tina uma, ma e ao ai foi ma le $5.00 auā le faatauina o mea e faaaogā i le umukuka.
O le polokalame na amata i le tatalo ma le faamalosi mai le afioga a le Atua na saunoa i ai le tina matua ia Filomega Saumani, ona sosoo ai lea ma le asiasiga o a latou meataulima.
Matagofie ma felanulanuai le taumafaiga a nai tina, ia latou asiasiga auā sa tapena lava faafafine toaga a latou sauniuniga, ma ua alagatatau ai le muagagana a le atunuu e au le inailau a tamaitai.
Na faaiu i faigasiva ma fiafia lea na toe faamanatu ai feoaiga o vae o teneiti a o laiti ae lei faaaogāina ni tootoo ma ni wheelchair, ae lē gata i lea, o le aso mulimuli foi lea ua galo uma ai ni faaletonu ma ni mea sa tutupu i le tausaga atoa a o mafuta ai. Na maua le loto faamagalo o le tasi i le tasi ma ua toe tutupu ai le moemoe fou ina ua maua lagona o le soifua mai o le pepe o le Kirisimasi.
O le mafutaga lenei o loo taitai ai le tina ia Luisa Peterson, failautusi Afamasaga Taituuga ma le teutupe o Luma Saunaiti. O le tausaga 2010 na amata ai lenei mafutaga ma o loo tagi lava i lima le faatinoina o vaega uma, e leai se fesoasoani a le malo o maua mai.
Ae o le agaga fiafia i nei tina o le maua lea o le avanoa e mafuta ma taaalo, talatalanoa, ma aai faatasi auā e seāseā maua se laolao faapenei mo latou i le tele o aso.
E toatele nisi o tina ua fai i lagi le folauga, ma o le masani foi e alu asiasiga i tina o loo mama‘i ma ave le fesoasoani i nisi o tina matutua ua lē mafai ona toe auai atu.
